Ranchi, K’lyngkot:
Ka Jharkhand, ka la pynmih ïa ka jingmaham ïa ka koit ka khiah, hadien ba ki don arngut kiba suba ba ki don ïa u khñiang jingpang Nipah ha ka West Bengal ka jylla kaba marjan.
Ka tnad ka koit ka khiah jong ka jylla ka la ïalam ïa ka jingpeitngor, ka jingpyntip stet bad ki jingpynsngewthuh paidbah ha kylleng ki distrik ban ïada na ka jingpur kaba lah ban mih. Ka sorkar pdeng ka la pynthikna ban kyrshan pura ïa ka West Bengal .
La pynmih ïa ka jingmaham ha Jharkhand hadien ba la lap ïa arngut kiba suba ba ki don ïa u khñiang jingpang Nipah ha ka jylla ba marjan jong ka West Bengal, la ong uwei u heh sorkar.
Ka tnad ka koit ka khiah jong ka jylla ka la pynmih ïa ka kynhun jong ki kyndon halor ka jingpeitngor bad ka jingpynsngewthuh paidbah, la ong u heh sorkar.
Ka jingpang Nipah ka dei ka jingpang kaba lah ban pyntip, kaba don ka jingïap kaba bun bad kaba lah ban saphriang stet, kaba donkam ban pyntip mardor sha ka sorkar pdeng.
“Nga la ai jingbthah ba ka jingpeitngor kaba pyrkhing bha, ka rukom ai jingtip kaba stet, bad ki prokram pynsngewthuh paidbah dei ban pyntreikam ha baroh ki distrik khnang ba ki briew kin ïoh ïa ka jingtip kaba pura shaphang ki dak ki shin, ka jingïada, bad ki lad jingïada kiba ïadei bad kane ka jingpang, bad ban ïada na kano kano ka jingpur ha Jharkhand,” ong u Myntri ka koit ka khiah u Irfan Ansari ha ka kyrwoh khubor.
U heh ophisar jong ka tnat ka koit ka khiah jong ka West Bengal u la ong ha ka lah sngi U Blei ba arngut ki Nurse kiba trei ha kawei ka hospital shimet ha North 24 Parganas distrik ki la pyni ïa ki dak ki shin jong ka jingpang Nipah.
U Myntri ka koit ka khiah ka sorkar pdeng u J P Nadda u la thoh ruh sha ka Myntri Rangbah ka West Bengal ka Mamata Banerjee, da kaba pynthikna ïa ka jingkyrshan kaba pura na ka sorkar pdeng, la ïathuh ki tyllong khubor.
