Shillong, K’Lyngkot 13
U Bah Wailadmiki Shylla uba dei u Myntri ba khmih ïa ka tnad ka koit ka khiah ka Sorkar Jylla u la pyntip ba ka jingslem ban siew tulop ïa ki Nos kontrak kadei namar ba ka por trei jong ki ka la kut kumta hap pynbeit thymmai biang.
U la ong ba tnad ka hap ban phah jingtip da kawei pat ha ka tnad finance ba kin lah ban mynjur biang bad mynta ki dang pynbeit biang sa shisien halor kane ka kam.
Haba kren sha ki lad pathai khubor u Myntri u la pyntikna ba ha une hi u bnai, yn sa lah ban pynbeit bad ka tnad finance kan sa pyllait noh shen ïa ka jingmang pisa.
Haba kylli u Myntri u la ïathuh “Ki don kumba 400 duna eiei ki Nos kontrak ki bym shym pat ïoh ïa ka jingsiew”.
Ha kaba ïadei bad ka jingmih ka jingkynnoh ki seng saiñ hima bad ki seng bhalang ba la shu phah trei ïa ki Nos kontrak khlem da don ka jingthoh hynrei ki shu ong da ka ktien, u Bah Wailadmiki u ong “Ka don ka jingslem ha ka kam na ophis, kumta kin ym lah ban pynsangeh ïa ki watla kim pat ïoh ïa kata ka jingthoh namar ka tnad ka koit ka khiah ka long kaba pher bad kiwei pat ki tnad kam bad ka dei ka kam ïap kam im jong ki briew”.
