Nongpoh, K’Lyngkot 13
Ha kawei ka jingjia ha ka sngi Ba-ar, kawei ka karkhana shna ‘Mattress’ kaba don ha Amjok, Byrnihat kaba la tip kyrteng kum ka Ummadat Foam Industries kala kem ding kynsan kat haduh ba baroh ki jingdon jingem ha katei ka karkhana la duh lut khait.
Katkum ka khubor ba la ïohlum, la ïathuh ba katei ka jingjia ka dei kaba la jia ha ka por kumba 3 baje eiei ha kaba ka ding kala sdang nyngkong na kawei ka kor kaba ot ïa ki ‘Foam’ bad wat hadien ba ki nongtrei kila pyrshang ban pynlip ruh kim lah leh eiei shuh.
U trai katei ka karkhana, u Adarsh Jhunjhunwala u la ïathuh ba katei ka ding kaba la sdang nyngkong na katei ka kor ot ïa ki Foam kala ïoh ban bam duh lut ïa baroh ki jingdon jingem ha katei ka karkhana kaba la antad da ki spah klur tyngka.
Tang mar ïa ïoh jingtip halor kane ka jingjia, ki pulit ka thanad Byrnihat ryngkat bad ki pulit pynlip ding na Narbong bad na ka Jylla Assam ki la wan poi ban pyrshang pynlip ïa ka ding kaba la klang, hynrei wat hapdeng katei ka jingpyrshang ka jong ki, ka ding kala ïoh ban bam duh lut ïa baroh ki jingdon jingem katei ka karkhana ka jong u.
Na ka liang u Rangbah Shnong ka Amjok, u Bah Raju Jyrwa u la pynpaw ïa ka jingsngewnguh sha ki paidbah nongshong shnong kiba la mih ban ïarap pynlip ïa ka ding khamtam ïa ki bor pulit ba lyngba ka jingshimkhia ka jong ki, la lah ban tem noh ïa ka jingklang jong katei ka ding shwa ba kan ïoh ban pur pat sha kiwei ki ïing ki sem kiba don marjan bad katei ka karkhana.
