Shillong, K’Lyngkot 13
U National Working President ka BJP u Nitin Navin u la pynpaw ka jingkyrmen ïa ka rukom treikam bad ba ka seng kan lah ban leh bha ha ka ilekshon MLA ha u snem 2028 ha Meghalaya, da kaba khmih lynti ba ka BJP kan jop palat ïa ki shiphew ngut.
U la pynpaw ïa kane ha ka jingïakynduh bad u MLA ka BJP na Pynthorumkhrah u Bah AL Hek ha ka sngi Ba-ar na ka bynta ban ïakren bad ïatai halor ki lynti ïaid jong ka seng hapoh ka Jylla.
Kane ka jingïalang ka la phaikhmat ruh kumno ban nang pynïar ïa ka seng bad pynkhlaiñ ïa ka jingtrei ha ki shnong ki thaw lyngba ki kam pynroi.
U Navin, uba dang shimti dang shen kum u National Working President, u la pynpaw ïa ka jingkyrmen halor ka jingkiew jong ka seng hapoh Meghalaya.
Kumba ka long mynta, ka BJP ka don tang ar ngut ki MLA kata ba kynthup ïa u Bah AL Hek bad u Bah Sanbor Shullai, MLA ka South Shillong uba long ruh u Myntri ka Sorkar Jylla ha ka ïingdorbar kaba don 60 ngut ki dkhot.
