Nongstoiñ, K’Lyngkot 13
Ka kam rep kam riang ka dei kawei ka bynta kaba kongsan tam khamtam ïa ki paidbah nongshong shnong ha ki thaiñ nongkyndong bad lah ban ong ba lyngba kane kiba bun ki longïing ki ïoh ban kyrshan ïa ka ïing ka sem bad ha kiba bun ki jingdonkam kaba man ka sngi, hynrei lada kane ka kam, kam shym la seisoh, ka pynlong shisha ka jingduh jingkyrmen ba kin nang bteng ïa kane ka kam.
Ka kam rep sying ka dei kawei ka bynta kaba kongsan ha ki thaiñ Langja ha West Khasi Hills bad kiwei kiwei ki shnong ha katei ka thaiñ hynrei la ong ba kumba long mynta ki paidbah nongrep ki mad ïa ka jingeh namar ka jingïap tram lane ïap khlam jong u sying.
Ki katto katne ki riew rangbah ha ka jingdonlang ki longkmie jong ka thaiñ Langja haba kren halor kane ka phang ki la ong ba ka jingrep sying ha ka thaiñ Langja bad kiwei pat ki shnong kiba don kumba 7 tylli ki shnong ha u snem ba la lah ki nongrep ka thaiñ ki ïoh ïa u symbai sying na ka Sorkar bad naduh bala rep ïa une u sying kaba ki ïoh symbai kaba sngew lyngngoh ka long ba la ar snem mynta une u sying u ïap khlam lane ïap tram baroh khoit bad mynta kim ïoh shuh ban lum ïa u sying.
Shuh shuh ki la ong ruh ba ka rukom ïap khlam une u sying ka long thik kumba u sying u mih dud bad kum ki nongrep ki sah ha ka umdum namar ka rukom ïap khlam jong u sying lada ïaid da ka kjat na kawei ka lyngkha kaba u sying u ïap khlam sha kawei pat ka jaka rep kaba khlem ïap khlam hap ban sum ban sait lym kumta kan ktah bad u sying un ïap khlam lang sha kato kawei pat ka jaka rep bad wat ïa ka byrni ruh lada yn thep lang ïa u sying ka ïa bit lang bad ki sying kiba bha ruh.
“Ngi sngew lyngngoh shi katdei eh ïa ka jinglong une u symbai bad naduh ba ngi la shong shnong hangne la 70 snem ngim pat ju ïoh mad hynrei dei tang mynta u snem,” ong kitei ki rangbah.
Shuh shuh na ka liang kine ki riew rangbah ki kyntu jur ïa ka Sorkar Jylla ba kan shimkhia bad wan peit bniah ïa kane ka jingïoh jingpang jong u sying khnang ba ki nongrep kin nym sah ha ka umdum.
