Shillong, K’Lyngkot 13
Ki katto katne kiba die jingdie ha lynti ïaid kjat hakhmat Civil Hospital Shillong ki la pynpaw ba ki hap shong ban die jingdie ban ïoh bylla jakpoh watla ka pynwit ruh ïa ki paidbah.
Haba u Nongsaiñ Hima u la buddien biang ïa ka jingthmu ka Sorkar Jylla ban kyndang ïa kiba shong die madan, la ïoh ban ïakren bad ki katto katne ngut kiba la ïathuh ba haduh mynta kam pat bthah ïa ki ba kin leit shong noh sha ka jaka kaba ka la pynkhreh hynrei ki dang bteng ban shong ha katei ka jaka.
Ki la ïathuh ruh ba kane ka jaka ka lah ban wit ïa ki paidbah ba ïaid ba ïeng hynrei kim banse ban shong namar ka bylla sngi.
Ki la ong ruh ba lada phah shong noh shawei ïoh lehse ka ïew kam biang ha katei ka jaka namar kam dei ka jaka kaba ki briew ki ju ïaid lynti hynrei ki hap ban leit ryngkat ka jingïateh kular bad ka Sorkar ban wan phai biang sha ka jaka kaba ki ju shong man ka por ynda la dep ban shna ïa katei ka lynti ïaid kjat.
Shuh shuh ki la ïathuh ba kiba die madan ki don kumba 22 ngut hynrei haduh mynta kim pat ïoh shithi eiei na ka Sorkar ban phah kynriah jaka shawei.
“Ngi kham sngewlah die hangne hakhmat Civil Hospital namar ki bun kiba ïaid ba ïeng hynrei ban leit shong shajan PWD la duna ki briew kiba ïaid ba ïeng,” ki la pynpaw.
Kumban shu pynkynmaw ka Sorkar Jylla ka la pynkhreh ban kyndang ïa kiba die harud surok hadien ba ka Sorkar ka la ??p kyndang ïa kiba shong ha Khyndailad.
Haba ka Sorkar ka la pynkhreh ban weng ïa kiba die madan hakhmat Civil Hospital la pynkhreh ban phah shong ïa ki ha syndah PWD ophis kaba don ha Barik point.
