Shillong, K’Lyngkot 13
Ka Hynñiewtrep Youths’ Council (HYC) ka pynrem jur ïa ka rai jong ka Meghalaya Transport Corporation (MTC) ban pynkut noh ïa ki jingpynïaid ïa ki bos na bynta ki khynnah skul naduh ka 01 tarik u Ïaïong, 2026, ka rai kaba yn ktah jur ïa ki hajar ngut ki khynnah skul bad ïa ki longïing jong ki ha kylleng ka Jylla.
Ha ka kyrwoh ba la phah ha ka sngi Ba-ar jong ka taïew, ka HYC ka ong ba kane ka rai kaba la shim kynsan ka pyni ïa ka jingbym burom bad jingbym kheiñ snep ïa ka jingshngaiñ jong ki khynnah skul ïa ka jingïoh lad ban pule bad ïa ka jingmyntoi uba bun balang na bynta kiba bun ki longïing, khamtam kito kiba wan na ki ïing kiba duna ka ïoh ka kot.
“Ki bos MTC kim dei tang ka jingsiew ha ka leit ka wan hynrei ki long ka jingïarap ba donkam eh kaba pynthikna ïa ka jingïaid lynti kaba shngaiñ bad kaba lah ban siew” ka la ong.
Ka HYC ka buh jong kylli ruh ba kumno ka MTC kaba dei jong ka Sorkar ka shim ïa kum kane ka rai khlem da pyrkhat ïa ka bit ka biang jong u paidbah bad khlem da pynbeit da kumwei pat na ka bynta ka suk ka bha jong ki khynnah bad ki ïing ki sem jong ki. “Ban pynbor ïa ki khynnah skul ban shaniah ha ki kali paidbah kiba khapngiah, ki kali bym shngaiñ lane ban ïaid ïa ki lynti kiba jngai ka buh ïa ki ha ka jingma kaba khraw bad ka ktah ruh ha ka liang ka pisa pilaiñ” ong ka HYC.
Ka HYC ka pynpaw ba ka pule puthi kam lah ban shah pynwit namar ka jingbym biang ka rukom pynïaid kam jong ka MTC ne jingduna ha ka pla tyngka jong ka. Lada don ki jingeh, ka dei ka kamram jong ka Sorkar bad ka MTC ban pynbeit ïa kita ki jingeh ym ban pynkit ïa ka jingkit ha ki khynnah skul bad ki kmie ki kpa.
Namarkata, ka HYC ka dawa ba ka MTC ka dei ban bishar thymmai bad ban weng noh mardor ïa ka rai ban pynkut ïa ki bos skul naduh ka 01 tarik u Ïaiong, 2026, hynrei ban bteng ïa ki bos MTC na bynta ki khynnah skul haduh ba yn da pynkhreh ïa ka lad jingïarap kaba shngaiñ, kaba lah ban siew bad kaba pdiang paidbah bad ban don ka jingïasyllok bad pynsngew paidbah kaba shai bad baroh kiba don bynta lang, kynthup ïa ki kmie ki kpa, ki skul bad ki kynhun.
Ka HYC ka pynpaw shai ba kan ym shu sngap jar ïa kum kine ki rai kiba ktah ïa ka lawei bad ïa ka jingshngaiñ jong ki khynnah skul bad lada ki bor ba dei peit kim pyrkhat thymmai ïa kane ka rai, ka seng kan leh ïa kaba donkam na ka bynta ban ïada ïa ki hok jong ki khynnah skul.
