Shillong, K’Lyngkot 13
Ka All A’Chik Youth Welfare Society (AAYWS) ka la pyrshah jur haba ïadei bad ka jingthmu ban ailad ïa ki bym dei ‘riewlum ban ïakhun ha ka ilekshon ban wan sha ka Garo Hills Autonomous District Council (GHADC).
Ha ka kyrwoh khubor, u President ka AAYWS, u Zingzing N. Sangma u la ong, “Ngi ïeng skhem ba dei ban shah tang ïa ki kyrtong ‘riewlum ban ïakhun bad ban mihkhmat ïa ki paidbah ha GHADC. Ka jingailad ïa ki bym dei ‘riewlum ban ïashim bynta kan pyntlot ïa ka jingthmu jong ka jingsynshar ba laitluid bad ka lah ban wanrah ïa ka jingtehlakam ba na shabar halor ki jaka ‘riewlum, ki aiñ riti-dustur, bad ki rukom synshar tynrai, kiba ym lah ban pdiang da ka jaidbynriew trai-ri A’Chik (Garo).”
Ka seng ka kyntu ïa ki bor ba dei khmih bad ïa ka Election Commission ban bat bad pynneh ïa ka Khyrnit ba 6 jong ka Riti Synshar ka Ri, da kaba pyntikna ba ki hok jong ki ‘riewlum kin ïoh ka jingïada.
“Ka AAYWS ka kyntu ïa ki bor ba dei khmih bad ka Election Commission ban bat bad pynneh ïa ki kyndon jong ka Khyrnit ba 6 bad ban pyntikna ba yn ym ïa-peiñ ïa ki hok jong ki ‘riewlum trai-ri la ka long ha kano-kano ka rukom,” ong ka kyrwoh.
Shuh shuh ka AAYWS ka la kyrpad ïa ki kynhun seng A’Chik bad ki nongshong shnong ban ïai long kawei ha ka ban ïada ïa ka jingsynshar ba laitluid jong ka GHADC, da kaba pynskhem ba “ka GHADC ka dei jong ki ‘riewlum trai-ri jong ka Ri-lum Garo, bad ka dei ban ïai neh beit tang hapoh ka jingïalam jong ki ‘riewlum.”
