Shillong, K’Lyngkot 13
U Bah Vivek Syiem, Superintendent of Police ka East Khasi Hills District u la ïathuh ba ki pulit ha ka 13 tarik u Kyllalyngkot 2026, ki la kem noh ïa u pulit Home Guard hadien ba la saphriang ka durkhih ha ki rynsan social media, kaba pynpaw ba u la dawa pisa be-aiñ bad pyntieng ïa ki nongleit nongwan.
Haba kren sha ki lad pathai khubor, u Bah Vivek Syiem u la ïathuh ba ka jingtohkit ka la sdang hadien ba la ïohi ïa ka durkhih kaba la pyllait ha ka Youtube Channel kaba ai kyrteng Karan Goala Expii.
“Ha katei ka durkhih, une u pulit Home Guard u la byrngem bad dawa pisa na kine ki briew haduh T.15,000”, u la ong.
Katkum ka jingtohkit mynta ka sngi, u Bah Vivek u la ong ba la lap ba u ne u briew u dei uba kyrteng u Regan Kharlor, 35 snem ka rta, uba dei u Home Guard Volunteer uba trei bad ka Madanrting Traffic Branch.
U la pyntip ruh ba kane ka jingjia ka la jia myn ha ka 26 tarik u Nohprah, 2025 ha ka por kumba 9:35 mynstep ha ki thaiñ Saw Lad, Madanrting, Shillong.
Shuh shuh u Bah Vivek u ong ba ka kali Maruti 800 (AS 01 F 1460) ka la jan tynrah ïa u katba u dang don ha ka ‘Clamping Duty’. Namar ka jingbitar, une u Home Guard u la bud ïa katei ka kali da kaba shim ïa kawei ka scooty jong u wei u nongleit nongwan bad u la pynsangeh ïa ka kali ha Happy Valley.
“U la rung hapoh ka kali, u la kren da ki kyntien ba khlem akor bad byrngem ïa ki nongshong kali. Ha kaba nyngkong u la dawa T.1 lak, hynrei hadien ka jingïakren bad ki nongshong kali, u la pynhiar sha ka T.15,000. Ar ngut ki nongshong kali ki la leit shim pisa na ka ATM ha ïew Madanrting bad siew ïa u,” la bynrap u Bah Vivek.
U la ïathuh ruh ba une u Home Guard um shym la pyntip eiei halor kane ka jingjia sha ka tnad Traffic ne ha ki heh pulit tad haduh ba ka durkhih ka la saphriang ha ka 12 tarik u Kyllalyngkot 2026.
Halor kane, ka Madanrting Police Station ka la shim ïa ka Suo Moto Case (Case No. 8126) bad la register ïa ka case hapoh ki kyndon ka Bharatiya Nyaya Sanhita (BNS) kaba kynthup ïa ka Section 308 (5): Halor ka jingdawa pisa (Extortion) Section 351: Halor ka jingpyntieng (Criminal Intimidation) bad ka Section 352: Halor ka jingpyndonkam da ki kyntien kiba khor bad kiba sniew.
“La weng noh ïa u Regan Kharlor na baroh ki kam hapoh ka District bad la wallam ïa u hakhmat ka Ïingbishar (Court) mynta ka sngi. Ka tnad pulit ka la pyntip ruh ba ki la ïakren bad ki lanot (victims) ban shim ïa ka jingphla (statement) jong ki, khnang ban pynskhem ïa ka case bad ban mudui kloi (charge sheet) ïa kane ka kam runar” la ong u Bah Vivek.
