New Delhi, K’lyngkot:
Ki pulit ka nongbah Peel jong ka Canada, ha ka Sngi Nyngkong, ki la kem ia uwei u briew, ha kaba iadei bad ka Project 24K, kaba dei ka jingtohkit, halor ka jing tuh palat $20 million ki symboh ksiar, kaba dei ka jing-lute ksiar kaba heh tam ha ka histori jong katei ka Ri.
U Arsalan Chaudhary, 43 snem ka rta, u la shah kem ha ka Kad Liengsuiñ jong ka Toronto Pearson, ha ka por ba u wan na ka liengsuiñ na Dubai, United Arab Emirates. Ki pulit ki la ong ba u Chaudhary um don “ka jaka shong jaka sah”.
La pynngat ia u hapoh ki kyndon pynkheiñ aiñ haba iadei bad ka jingshah kynnoh tuh ba palat $5,000, ka jingbat ia ki mar ki mata kiba la ioh da ka kam runar, bad ka jingthmu ban leh ia ka kam runar kaba long pyrshah ia ki aiñ ki kyndon jong ka ri.
Ka liengsuiñ ka la poi ha kad liengsuiñ Toronto Pearson International Airport na Zurich, Switzerland, ha ka 17 tarik u Iaiong, 2023, da kaba kit ïa ka mar kaba don kumba 400 kilo ka ksiar .9999-pure, kaba ïaryngkat bad 6,600 tylli ki bar bad kaba shongdor palat ïa ka $22 million dollars.
La pynhap ia katei ka mar bad la pynkit sha ka jaka ba kyrpang ha ka jaka jong ka kad liengsuin hynrei la iathuh ba ka la jah hadien katto katne kynta.
Nangta ki pulit ki la pynlong ïa ka jingtohkit shabar pud bad ki la ithuh bad pynngat, lane pynmih ïa ki hukum na ka bynta shiphew ngut ki briew ha kaba ïadei bad kane ka jingtuh.
Napdeng jong ki la don ruh u Simran Preet Panesar uba la 33 snem ka rta na Brampton. U Panesar, uba dei u nongtrei barim jong ka Air Canada, uba la ngeit ba u don ha India, la iathuh ba u la iarap ban ithuh bad pynkylla lynti ia kawei ka jingkit mar, da kaba pyndonkam bakla ia ki system jong ki liengsuin.
La lap ia u ha u snem ba la dep ha kawei ka iingmala ‘flat’ ba la ai wai ha ki rud jong ka nongbah Chandigarh. La pynmih ia ka hukum kem ha baroh kawei ka Canada pyrshah ia u Panesar.
