Shillong, K’Lyngkot 13
U Bah Paul Lyngdoh, MLA ka UDP na West Shillong u la phah da ka jingthoh sha u Myntri ka tnad Bording Bah Metbah Lyngdoh kaba pynpaw ïa ka jingsngewkhia halor ka jingduna ka jingpynpoi bad jingsam bording ilektrik ba dang ïai bteng ha ka jylla Meghalaya.
Katkum ka jingpynsngew u Bah Paul, ka jingpynlip khah khah ïa ka bording ilektrik, ka jingpynlip bording khlem da pynkhreh bha bad ka jingthud ha ka rukom sam ïa ka bording kala ktah ïa ki ïing ki sem, ka khaïi pateng bad ki kam ai jingshakri kiba kongsan.
“Nga pan jingpynshai na u Myntri halor kine ki mat kiba kongsan bad kyrpad ba dei ban don ïa ka “Comprehensive Action Plan” bad ka dei ruh ban don ha ka rikod,” ong u Bah Paul.
U Bah Paul u la ban jur ïa ka jingdonkam ban shim ïa ki sienjam kiba mardor, da kaba pynpaw ba ka ktah ïa ka jingshngaiñ jong ki paidbah, ka kamai kajih bad ïa ki kam ai jingshakri kiba kongsan.
U la pynpaw ruh ïa ki 7 tylli ki jingkylli kiba kongsan, kaba kynthup ïa ka jinglong jingman jong ki jingtei ha kaba ïadei bad ka jingpynïaid bad jingsam, AT&C Losses bad ka jingpyntreikam ïa ka Automation bad SCADA-Based Monitoring Systems.
U la ban jur ba ka bording ka dei kaba kongsan bad ka jingai jingshakri kaba kongsan ïa ki paidbah bad kam long kaba ïahap ïa ki paidbah kiba pyndonkam ïa ka bording ba kin mad jingeh na ka jingpynlip khah-khah ïa ka bording bad ban don ka jingkiew ne jinghiar jong ka Voltage ne Voltage Fluctuations.
U Bah Paul u la ong, ba kala don ka jingïapher bak-ly-bak halor ka jingshim jingkitkhlieh ki heh ophisar bad ka rukom ai ïa ka jingshakri bad ka kdew ba la mang bun ïa ka pisa na ka bynta ki jingtei ban pynkhlaiñ bad ban ïaid katkum ka juk kaba mynta.
“Ka jingbym ïohi ïa ka rukom pynbha kala pynmih ïa ka jingsngewkhia kaba jur ha kaba ïadei bad ka rukom pynwandur, ka jingpyntreikam bad ka jingïohi jngai jong ka tnad bording,” u la bynrap.
U la kyntu ïa u Myntri ban wanrah ha ka jingïalang jong ka kynhun Myntri da kaba buh ïa ka por bad ïa ka rukom treikam kaba paka ban pynduna ïa ka jingpynlip ïa ka bording ilektrik, ban pynbha ïa ka rukom pynïaid bad rukom sam bording, ban tem ïa ka jingduhnong bad ïa ka jinglait tuh jong ka khajna bad ban pynneh biang ïa ka jingshaniah ki paidbah ïa ka kam sam bording ka jylla.
