Moscow, K’lyngkot:
Ka Russia ha ka miet ba la dep, ka la leit thombor sa ia ki 2 tylli ki jhad jong ki riew paidbah, ha ka duriaw Black Sea, ha kaba baroh ar tylli, ki dei kiba kit ia ki marbam, ong u Myntri ka tnat pynroi jong ka Ukraine ha ka Sngi Nyngkong.
Bad la ong ba kitei ki jingshah thombor, ki la pynjulor bad pynpluh ia kawei na ki jhad bad pynmynsaw ia uwei u dkhot nongtrei jong katei ka jhad kit marbam jong ka Ukraine.
Ka Russia ka la thmu thombor ïa ki lieng kiba leit sha Ukraine ha baroh shi katta ka jingleit hiar thma jongka kaba la jan 4 snem kynthih, kaba long ruh shi bynta na kaba ka Ukraine ka la khot ka jingïakhih jong ka “jingpyntieng” kaba thmu ban khanglad ïa ka jingshalan mar jongka shabar, lyngba jong katei ka duriaw.
Ka Russia, kaba kyntait ba ka la thombor ia ki riew paidbah, ka la maham ba kano- kano ka jhad, kaba leit sha ki kad lieng jong ka Ukraine, ka lah ban shah kheiñ kum kaba kit ia ki tiar shipai.
“Ka drone jong ki nongshun ka la ther ïa kawei ka jhad kit mar kaba don ka lama Panama kaba dang ap ban rung sha kad liengsuiñ ban thep ïa ka umphniang jhur. Sngewsih ba uwei u nongtrei u la mynsaw,” ong u Oleksiy Kuleba, u Myntri pynroi jong ka Ukraine, haba ai jingkren sha ki nongthoh khubor ha katei ka sngi.
La iathuh ruh ba la don ki jingshah thombor ha kawei ka jhad kaba don ia ka lama jong ka San Marino, kaba dang mih na ka kad lieng ryngkat bad ka jingkit ia u kew bad kane ka long ka jingpynshisha ba kham shai ba ka Russia ka thmu ban thombor wat ia ki jhad jong ki riew paidbah, ka khaïi- pateng ha ka pyrthei bad ka jingshngaiñ ha ki um duriaw.
U Lat jong ka Odesa, U Oleg Kiper, u iathuh ba kitei ki jing thombor, ki la jia ha kylleng ka kad lieng jong ka Chornomorsk, ha ki rud duriaw jong ka Ukraine, kaba don sha ka phang Shathie jong ka ri.
