Shillong, K’Lyngkot 14
Ka kynhun jong ki nongtrei Kontraktor ka Jylla ha ka sngi Balang ka la leit ban ïakynduh ïa u Bah Wailadmiki Shylla Myntri ka tnad Health & Family Welfare haba ïadei bad ka jingpynmih ïa ki kam ban maramot ïa ki jaka ai jingsumar (Health Centre) kiba don ha ki District Headquarter bapher-bapher.
U Bah Emanuel Syiem Malngiang, Secretary ka Meghalaya Contractors & Supplier Association haba kren sha ki nongthoh khubor u la ong ba ïa kine ki kam ban maramot ïa ki jaka ai jingsumar kum ha Jowai, Nongpoh, Nongtoiñ, Maweit bad kiwei ka dei kaba lah ban phiah, hynrei ka tnad ka la pyllait beit da ka song ka baheh (Package).
“Kine ki kam ki dei kiba lah ban phiah, hynrei ka jingpynmih ïa ka kam ka long ba ha kawei ka jaka ai jingsumar, ka mih tang kawei ka song, kiba bun kine ki kam ki dei ki ban maramot ïa ki jaka ai jingsumar ba kynthup ruh ki jaka sah jong ki nongtrei, kiba don haduh 7 tylli ha kawei ka jaka ai jingsumar” la ong u Bah Emanuel.
U la ong ba ka Association ka kyrpad ïa u Myntri ka tnad ban phiah ïa kitei ki jingtrei…khnang ba ki kontraktor kin ïa ïoh kam lang.
Shuh-shuh u Bah Emanuel u la ïathuh ba na ka liang u Myntri u la ïathuh ba ka jingeh ban phiah ïa ki kam dei ba duna ki ‘technical staff’ namar ba u wei u Junior Engineering (JE) u hap ban peit ïa baroh kawei ka District dei na kata ka daw ba ka tnad ka pynkhreh beit tang da kawei ka song ha kawei ka Health Centre.
U la ïathuh ba ki la kyrpad ïa u Myntri bad ka tnad ba dei ban peit bha, haba ki leh ha kane ka rukom ba da ka song kaba heh ka ktah bad pynduh nong pat ïa ki nongtrei kontraktor ka Jylla.
