Jowai, K’Lyngkot 14
Da ka jingthmu ban pyllait ïa ki kali kamai bad kali shimet na Rilum Jaiñtia na ka jingsiew pisa ha Toll Plaza, kaba don ha Ialong, u MDC jong ka Congress u Ma Rikut Parien u la leit buh da ka jingthoh ha u Deputy Commissioner jong ka West Jaiñtia Hills District ha ka 14 tarik Kyllalyngkot.
Kane ka la wan hadien ba u MDC u la ïoh jingujor na ki kali kiba wan khamtam na Laskein C&RD Block bad wat na Phramer kiba ïaid sha Jowai tang kumba 4/5 Km na ka surokbah bad ki shah pynbor ban siew ïa ka bai tollgate.
Ha ka jingthoh ba la aiti ha u DC, u MDC u la ong ba katei ka khajna ka long kaba khlem nongrim namar la shah pynbor ban siew kat juh kum kito ki kali kiba leit sha East Jaiñtia Hills bad ki Jylla ba marjan jong ka Jylla Meghalaya.
U la pynkynmaw ruh ba ha u snem 2023 la khot ïa ka jingïalang da u Deputy Commissioner ka West Jaiñtia Hills ha kaba ïadei bad ka khajna ba la lum da ka Toll Plaza bad la rai da kawei ka sur ba ki kali kiba don ïa u Registration Number (ML-04) ki dei ban pyllait na ka jingsiew khajna da katei ka Toll plaza.
U la pyntip ruh ba katei ka plaza ka la sdang ban pyntreikam ïa ki agent kiba pyntieng ïa ki nongñiah kali ban siew ïa ka khajna kaba lah ban wanrah ka jingbym shngaiñ ha ka shongsuk shongsaiñ.
Utei u MDC u la kyrpad ïa u DC ban pynskhem ïa ka jong ka jingïalang ha u snem 2023 bad ban pynthikna ba ki nongleit jingleit kin ïaid laitluid da kaba suk ba sain lyngba katei ka surokbah.
Hadien ka jingïakynduh, u Ma Rikut u la ïathuh ba na ka liang u DC u la kular ban khot ïa ka jingïalang ha ka taïew kaba khatduh jong une u bnai ne taïew ba nyngkong jong u bnai Rymphang ban ïaphylliew jingmut halor kane ka kam.
