Tura, K’Lyngkot 14
U Nongïalam ka Liang Pyrshah bad Myntri Rangbah barim ka Jylla, u Dr. Mukul M. Sangma ha ka Lah Sngi U Blei u la ïakynduh ïa ki bahaïing hasem jong u dkhot ba shah pynïap ka ACHIK, u Dilseng M. Sangma ha ka shnong Goalgaon ha Rajabala bad pynpaw ïa ka jingsngewlem halor kane ka jingjia.
U Sangma, ba la synran lang da ki katto-katne ki nongïalam saiñ pyrthei bad samla, ba kynthup ïa u MLA ka Dadenggre, u Rupa M. Marak, MDC ka William -nagar, u Alphonsus R. Marak, MDC ka Damas, u Pardinand D. Shira, MDC ka Rongrong, u Rinaldo K. Sangma, Richard M. Marak bad Saljagringrang R. Marak, u la ïasnohkti lang bad ka longïing kaba la duh noh ïa utei u samla, uba la shah pynïap ha ki runar ha ka taïew ba la dep.
Haba kren sha ki nongshong shnong, u Sangma u la kren halor ka jinglong-jingman ba jyrwit-jyrwat bad ki mat kiba la ïalam sha katei ka jingjia ba sngewsih, kynthup ïa ka jinglong trai ïa ka jaka, ka jingtih par be-aiñ, ka jingshngaiñ ha ki khappud, bad kiwei-kiwei, da kaba pynkynmaw biang ïa ki lad ki lynti ba la shim ha ka por ba u dang synshar ban pynbeit ïa ki kam tih par bad ban ïada ïa ka hok khyndew jong ki ‘riewlum katkum ka Khyrnit ba 6.
U la kdew ruh ïa ki aiñ ba la thaw ban tehlakam ïa ka ‘benami’ ha ka rukom bat khyndew, ka jingwan buhai shnong be-aiñ bad ka jingwan kyntur ha ki jaka khappud.
U Nongïalam ka Liang Pyrshah u la pyntikna ruh ïa ka longïing ba un sa buddien hi dalade ïa kane ka kam bad ki bor ba dei khmih khnang ban pyntikna ïa ka jingbishar hok kaba kloi bad ka jingpynshitom ïa kito kiba donkti ha kane ka kam runar.
Shuh shuh u la ïakynduh ïa ka khun jong une uba la khlad noh kaba dang pule ha ka klas IX bad pyntikna ban ai ïa ka jingkyrshan kaba pura na ka bynta ban bteng ïa ka jingpule jong ka.
