Mairang, K’Lyngkot 14
Ka District Magistrate jong ka Eastern West Khasi Hills District ka la pynjari da ka kyndon aiñ kaba 163 BNSS, 2023 ha baroh ki bynta ka Eastern West Khasi Hills kaba khang pyrshah ïa ka jingwan shalan beaiñ, ne pynïaid ïew tuh bad die ïa ki dohkha kiba la wan kit na Bangladesh khlem ki kot ki sla kiba biang.
Ha ka kyrwoh khubor na ka liang ka District Magistrate ka la maham ruh ïa ka jingpyndonkam ïa ki kali, ki lieng bad kiwei kiwei ki tiar ha ka ban kit bad shalan ïa ki dohkha bad ruh ïa kito ki riew shimet ne ki kynhun kiba don bynta ha ka ban pynïaid ïa kane ka kam beaiñ.
Shuh shuh ha kane ka kyrwoh khubor la pynpaw ba ïa kane ka aiñ la pynjari hadien ka jingdon jong ka jingkhaïi tuh bad pynïaid ïew ïa ka dohkha na Bangladesh ha kiba bun ki jaka khappud bad wat ha ki ïew ki hat namar kane kan ktah ïa ka kamai kajih jong ki nongshong shnong, ka ktah ïa ka shongsuk shongsaiñ bad ka buh jingma ruh ïa ka jingshngaiñ jong ka ri.
Ka District Magistrate, ka la ong ruh ba kino-kino kiba ïaleh pyrshah kin ngat ha ka jingshah pynsaja katkum ka kyndon aiñ 223 BNSS Act, 2023 bad kiwei ki kyndon aiñ kum ka BNS, Custom Act, Foreign Act, Passport Act, etc.
