Kolkata, Kyllalyngkot:
Arngut ki Nos na Barasat kaba don ha North 24 Parganas distrik jong ka West Bengal kiba la ïoh ïa ka jingpang Nipah bad mynta ki don ha ka coma bad ki don ha ka jingshitom kaba jur bha, ong ka khubor na ka Hospital ha ka sngi Balang.
Ha baroh ar, ka Glasgow Coma Scale (GCS) scores ka long na ka bynta ka jingplie ïa ki khmat, ka jingkren da ka ktien, bad ka jingai jubab ki la long hapoh san. Ka Nos kynthei ka la ïoh ïa ka jingpang Nipah, ha kaba ki nongmuna jong ka la pynthikna da ka National Institute of Virology (NIV), Pune.
Ki doktor ki la ïathuh ba u Nos shynrang, uba don mynta ha ka Ventilator Support, u lah ban shah ktah jur ha ka jingpang. Kumba 65 ngut ki briew kiba ïakynduh bad kitei ki arngut ki nongsumar, la ithuh bad la buh ïa ki hapoh ka jaka sumar ba kyrpang.Kine ki Nos kiba ïoh ïa ka jingpang, ki sah kum ki Paying Guest ha Hridaypur, Barasat.Arngut ki briew kiba sah bad u Nos shynrang bad kawei kaba sah bad ka Nos kynthei, ki la ïoh ïa ka jingshit bad ki don hapoh ka jingshah peit bniah.
Kito kiba la ïakynduh ïa ki nongpang, kynthup ïa u nongñiah Ambulance uba la pynkit ïa ki sha Burdwan Medical College bad Hospital, ki nongtrei ka koit ka khiah kiba don bynta ban sumar ïa ki, bad kiwei kiwei kiba don ha katei ka por, ki la shah peit bniah bad ai jingsumar ban ïada.
Ka sorkar pdeng ka la pyntreikam ïa ki kyndon ba la buh na ka bynta ka jingpeitngor, ka jingshim nuksa bad ka jingpynkhreh ïa ki jingthiah.Ka kynhun ba ïatreilang jong ki riew shemphang na ka tnad ka koit ka khiah jong ka jylla bad ka tnat ka koit ka khiah jong ka sorkar pdeng, ki la leit ban jngoh ïa ka hospital shimet ha Barasat, ha kaba ki nongsumar ki shah sumar.Ïa ki nongmuna jong ki 14 ngut kiba la ïakynduh ïa kane ka jingpang la phah sha AIIMS Kalyani ban Test, katba ïa kiwei pat ki nongmuna la lum na ka Hospital Katwa bad Burdwan Medical College Hospital.
Ki tyllong khubor ki ïathuh ba kawei ka Nos kynthei na Katwa ruh ka don ha ka jingshitom kaba jur bha bad ka la ngat ha ka Coma. Kawei ka RMO na katei kajuh ka hospital ka la ïoh ïa kijuh ki dak bad ka dang shah sumar. La phah test ïa ka snam jong u. Ym duna ïa ka 23 ngut ki nongtrei hospital kiba la shah set Quarantine haduh mynta, kane ka jingkheiñ ka lah ban nang kiew shuh shuh. Ïa kine ki arngut ki nongpang Nipah la lap nyngkong eh ha ka sngi U Blei da ka Virus Research and Diagnostic Laboratory (VRDL) kaba don ha ICMR-AIIMS Kalyani.
Baroh arngut ki Nos ki dei kiba la pynïasoh bad kawei ka hospital ha Barasat bad ki don mynta ha ka ICU jong kawei ka jaka sumar shimet. La phah ïa ka kynhun ïaleh pyrshah ïa ka jingpang ba ïatreilang ha ka ri ban ïarap ïa ka sorkar jylla ha ki lad jingïada bad ki lad jingsumar paidbah.
Kane ka kynhun ka kynthup ïa ki riewshemphang na ka All India Institute of Health and Public Hygiene, Kolkata; NIV, Pune; National Institute of Epidemiology, Chennai; AIIMS Kalyani; bad ka Department of Wildlife kaba hap hapoh ka Ministry of Environment, Forest and Climate Change.
U myntri ka koit ka khiah jong ka sorkar pdeng u J.P. Nadda u la pynthikna ïa ka jingkyrshan kaba pura na ka sorkar pdeng.U la thoh sha ka Myntri Rangbah ka West Bengal, ka Mamata Banerjee bad u la ïakren ruh bad ka lyngba ka phone, da kaba pynpaw biang ïa ka jingkular jong ka sorkar pdeng ban ai ïa baroh ki jingïarap ba donkam, ong ka kyrwoh na ka tnad ka koit ka khiah.
