Shillong, K’Lyngkot 14
U Myntri ka tnad ka Koit ka Khiah, Bah Wailadmiki Shylla u la kular ba ka Sorkar kan sa shimkhia haba ïadei bad ka jingslem jong ki jingsiew kiba dang ïai bteng jong ki ASHA – kiba la pynlong ruh ïa ka jingïakhih kum ka dak jong ka jingpyrshah halor kane ka bynta.
“Ka don katto-katne ka jingeh namarba ka pisa ka wan na ka Sorkar Pdeng. Ngi dang tynruh ban pyllait kloi katba lah ïa ka pisa,” la ong u Bah Shylla ha ki nongthoh khubor ha ka Sngi Balang.
Na ka liang u Myntri hashuwa u la ïakren ïa kane ka mat bad u MD-NHM, uba la pyntikna ïa ki nongtrei ba un sa pyntip sha ki halor ki jinglong-jingman.
“Kam pat poi ha ka jingtip jong nga ba kin dang bteng ïa ka jingïakhih jong ki, hynrei ngi dang ïaleh katba lah ban pyllait ïa ka pisa,” la bynrap u Bah Shylla.
Ki nongtrei ASHA ki la pynlong ïa ka jingïakhih sangeh treikam ha kine ki 7 sngi ba la dep, da kaba dawa ban pyllait noh ïa ki jingsiew ba sahteng jong ki.
