Shillong, K’Lyngkot 14
U Myntri ka tnad ka koit ka khiah u Bah Wailadmiki Shylla u la kyntait ïa ka jingdawa ban phiah ïa ki projek jong ka tnad ka koit ka khiah sha ki package kiba kham rit, da kaba kdew ba ka don ka jingduna ki nongtrei.
“Ka tnad ka koit ka khiah kam don bun ki nongtrei, kumba long ka PWD ne PHE ne kano-kano ka tnad engineering,” la ong u Bah Wailadmiki.
Haba kren bad ki lad pathai khubor ha ka sngi Balang, u Myntri u la batai ba ka jingphiah ïa ki projek sha ki bynta kiba kham rit kan pynlong bad buh jingeh ïa ki engineer ban peitngor bad buddien ïa ka jingtrei.
“Lada ïa kiba bun ki kam la phiah sha ki bynta kiba kham rit, kan long shisha kaba eh ïa ki engineer, ki junior engineer ban buddien ïa ka kam,” u la ong.
Ka All Meghalaya Contractor and Supplier Association (AMCSA) ka la dawa ba dei ban phiah ïa ki projek khnang ban ailad ïa ki kontraktor trai ri ban ïashim bynta ha ka jingthep bidding. Ka AMCSA ka la kynnoh ba ka jingpynïasoh lang ïa ki projek ka la long kumba iehnoh ïa ki kontraktor trai ri, kaba la ai jingmyntoi tang ïa ki katto katne.
“Ngim lah ban ïakhun… ki kontraktor kiba rit ki shah iehnoh beiñ,” ong ka AMCSA ha ka dorkhas ba la ai sha u Myntri.
Ka seng ka la kam ba ka Sorkar ka pynduh lad ïa ki kontraktor trai ri.
U Myntri u la ai ka jingkular ba ka tnad kan sa thung shuh shuh ïa ki nongtrei ban weng ïa ki jingeh na ka jingduna jong ki nongtrei.
