Shillong, K’Lyngkot 14
Kawei ka longkmie kaba la tip kyrteng ka Devi Basumatary ka la ujor ejahar sha ki pulit ka thanad Laitumkhrah pyrshah ïa uwei u nongtuh uba la prong tuh ïa ka ïingsah jong ka kaba don ha Upper Lachumiere, kaba la jia ha ka 13 tarik Kyllalyngkot 2026 ha ka por 2 baje nohphai sngi.
Ha ka jingujor sha ki pulit, ka Basumatary ka la ïathuh ba haba ka la poi ha ïing na ka jingwan donkam na Laitumkhrah, ka la lap ba ka jingkhang na khmat ïing ka la plie bad haba ka la rung hapoh ïing pat ka la lap ïa u nongtuh u ba dang khynra ïa ki mar ba remdor. Ha ka por ba ka thmu ban khang ïa u ha ka kamra ba u don bad ban pyrta jingïarap, utei u nongtuh u la khynniat ïa ka jingkhang bad ïoh ban tangon kylla ïa ka na ki bynta jong ka khlieh.
Ka la ïathuh ruh ba utei u nongtuh u la knieh ruh ïa ka pla kieng ba ka thep ïa ka mobile phone bad kiwei ki tiar kynthup ka pisa bad u la khang kut ïa ka ha kamra, hynrei kham hadien haba ka khun kynthei jong ka, ka la wanphai, ka la lap ba ka kmie jong ka, ka la don hapdeng ka jingmynsaw kaba jur.
Shuh-shuh la ïathuh ba katei ka longkmie mynta ka don hapdeng ka jingmynsaw kaba jur na ka jingshah tied ha utei u nongtuh bad mynta ka don hapdeng ka jingshah sumar ha Nazareth Hospital, Shillong.
