Bengaluru, K’lyngkot:
U Myntri ka tnat ki kam pohïing jong ka jylla Karnataka, u G Parameshwara, u la ong ba u Myntri Rangbah ka jylla u Siddaramaiah u la ïakynduh ïa u nongïalam ka Congress u Rahul Gandhi ha Mysuru ha ka jingleit jngoh jong u Rahul Gandhi ha ka lynti ban leit sha Tamil Nadu, bad kata kan long ka “jingïakynduh kaba sngewtynnad”.
Haba ïakren bad ki nongthoh khubor hangne shwa ka jingïakynduh jong kine ki nongïalam, u Parameshwara u la ong ba ki nongïalam ka seng ha ka jylla ki dang ïai ïakynduh man ka por bad ki heh nongïalam ha ka kyrdan jong ka ri.
“U nongïalam ka seng jong ngi bad u Myntri Rangbah u Siddaramaiah kin sa ïakynduh ïa u Rahul Gandhi ha ka jingleit jngoh jong u ïa ka Mysuru ha ka lynti ban leit sha Tamil Nadu. Kane ka dei ka jingïakynduh kaba sngewtynnad,” u la ong.
U Rahul Gandhi u la don ha Mysuru ha ka por shiteng sngi jong ka sngi Ba- ar, la ïathuh ki tyllong khubor jong ka seng Congress ha ka lad phah khubor.
Haba jubab ïa ka jingkylli la ma u ruh un ïakynduh ïa u Rahul Gandhi, u Myntri ka tnat ki kam pohïing u la ong ba kum kine ki jingïakynduh ki shong ha ka jingdonkam.
“Ngan leit lada don ka jingdonkam, lym kumta, balei ngan leit khlem da donkam?” u la ong. U Parameshwara u la kyntait ïa kano kano ka jingong ba ka don ka jingïapher hapoh ka seng bad u la ong ba um don jingartatien ban ïakynduh ïa ki heh nongïalam jong ka seng Congress ha kano kano ka por ba donkam.
“Kam don kano kano ka jingeh ban ïakynduh ïa ka Sonia Gandhi, u Rahul Gandhi, u Mallikarjun Kharge lane ka Priyanka Gandhi Vadra. Nga lah ban ïakynduh ïa ki ha kano kano ka por ba donkam,” u la bynrap.
