Shillong, K’Lyngkot 14
Ar ngut ki briew ki la shah kem noh ha ki pulit halor ka jingkynnoh donkti ban thombor bad knieh jubor ïa ka pisa na uwei u briew.
Katkum ka khubor na ka website jong ki pulit la ong ba u Dipankar Shill u la ai ka jingujor ba ha ka 12 tarik mynta u bnai, ha ka por kumba 8.30 mynstep, ar ngut ki briew bym lah ban ithuh durkhmat ki la thombor ïa u da ka tari hajan jong ka Dreamland Cinema Hall, Police Bazar, Shillong.
La ong ba ha kane ka jingshah thombor, une u briew u la mynsaw bad na ka liang kitei ki ar ngut ki la knieh jubor ka pisa kaba long T.1200 na u. Ha kaba ïadei bad kane, ki pulit hadien ba ki la pynlong ka jingtohkit, ki la kem noh ïa ki ar ngut ki briew ba la tip kyrteng kum u Rahul Kumar (22 snem) bad u Pynshailang Nongrum (26 snem).
