Shillong, K’Lyngkot 14
U Bah Chaltbha Muksor uba na Lad Rymbai (Dong Pohktieh) ha East Jaiñtia Hills district uba la jah ha Tamil Nadu ka dei namar ba u hiar shiteng lynti namar u kwah ban leit phai sha ïing.
Une u samla Khasi uba la jah ha ka por ba u leit wad kam sha Bengaluru la lap ïa u ba u shah sumar ha Government Medical College bad Hospital ha Krishnagiri, Tamil Nadu bad mynta u la poi sha shnong sha East Jaiñtia Hills.
Haba buddien ïa kane ka jingjia, la ïoh ban ïakren bad u samla Donboklang Nongphut uba dei u President ka Khasi Students’ Union (KSU) Bangalore Unit uba la ïathuh ba une u Chaltbha u la poi sha ïingsah sha East Jaiñtia ha ka sngi U Blei kaba dei ka 11 tarik Kyllalyngkot 2026 da ka jingïarap ka seng ban kit ïa u na Chennai ban wan ïalam sha Bangalore bad thied tiket liengsuiñ ban poi sha Guwahati.
U la ïathuh haba ka seng ka la ïoh ban kylli, ki don kumba 11 ngut kiba mih na Meghalaya ban leit bylla sha Bengaluru da kaba shong da ka rel hynrei ha shiteng lynti une marwei u la kwah leit phai ïing bad hiar marwei ha Tamil Nadu.
“Haba ka KSU East Jaiñtia ka la pyntip sha ïing, ngi la buh ïa ki jingïarap na ki paralok sha Tamil Nadu bad la ïoh jingtip na ki pulit ha ka por kumba 3 baje janmiet ba ïa u Muksor la lap ba u la mynsaw bad la pynthiah ïa u ha hospital Sorkar,” u la ong.
Kumta u la ïathuh ba ka KSU Bangalore unit hapoh ka jingïalam jong u ryngkat bad u nongai buit u Meban Plielad Shadap, u General Secretary u Bah Younidame Suchiang bad u Assistant General Secretary u Bah Pyndap Umsong ki la leit sha Krishnagiri bad ki la poi ha katei ka jaka sumar ha ka step jong ka sngi ba bud.
U la ïathuh ba ki la lap ïa u Bah Muksor ba u la shah sumar ha Dr. Krishnagiri Government Medical College Hospital, bad ki la kyrpad ïa ki bor pynïaid ka Hospital ban pyllait noh ïa u ban ïoh ïalam sha Bengaluru ban ïoh phah noh sha Guwahati namar ban sumar sha Chennai ka shem shitom bym don nongap.
Kumban shu pynkynmaw u Bah Chaltbha u la mih na Meghalaya ha ka 2 tarik Kyllalyngkot ha ka por kumba 11 baje eiei mynstep, ha ryngkat ki 11 ngut ki paralok, da kaba thmu ban leit wad kam sha Bengaluru. Hynrei la ïathuh ba u la rai ban hiar na ka rel ha ka 5 tarik Kyllalyngkot hajan Krishnagiri.
