Nongstoiñ, K’Lyngkot 14
Ka ïaid ka ïeng jong ki paidbah lyngba ka surok Nongstoiñ-Mawkawah ha West Khasi Hills kaba jrong 2.60 km ka la nang syrtok namar ka jingnang sniew jong kane ka surok ïa kaba haduh mynta na ka liang u kontraktor uba ïoh ban pyntrei um shym la leh eiei wat hadien ba ïa ka tender la dep ban ai katkum ba la pynpaw.
Ïa kane la pynthikna da ka Federation of Khasi Jaiñtia & Garo People (FKJGP) West Khasi Hills ha ryngkat ka Upper New Nongstoiñ Unit, kaba ha ka 14 tarik mynta u bnai ka la leit ban ïakynduh ïa u Executive Engineer ka PWD Nongstoiñ Division West Khasi Hills ban dawa ban pynkloi noh ïa ka jingmaramot ïa ka surok Nongstoiñ-Mawkawah kynthup ban shna ïa ka jaka ïeng kali.
U Bah Jistarland Lyngkhoi Assistant Secretary ka FKJGP West Khasi Hills ha ka jingdonlang u Bah Nelson Marthong, President FKJGP Upper New Nongstoiñ, Bah Droining Iawphniaw General secretary FKJGP Upper New Nongstoiñ haba kren halor kane u la ong ba katkum ka jinglap lyngba ka ophis u Chief Engineer PWD Road Meghalaya Shillong, la ai tender ïa kane ka surok ha ka 6 tarik Jymmang, 2025 kaba dei 2.60 KM ha ka mang pisa kaba phra phew phra lak arphew hajar.
Shuh shuh u la ong ruh ba ka jingleit ïakynduh bad ai jingthoh ïa u Executive Engineer ka long ban pynshisha ba hato na ka liang ka ophis ka la don jingtip ne em ïa kane ka kam namar la ïohi ba naduh katei ka por haduh mynta la shu ieh khongreng ïa katei ka surok bad ym pat i don dak eiei bad na ka liang ka seng lyngba ka jingthoh ka dawa ba dei ban pynsted ïa kane ka kam.
U Bah Jistarland u la ïathuh ruh ba ha ka jingïakynduh ïa u Executive Engineer, na ka liang jong u, u la shimkhia mardor bad u la phone ïa u kontraktor ba u dei ban sdang noh mardor ïa kane ka kam bad ka dei ruh ka jingshisha ym ba shu buh tang ha ka tender.
“Ym dei ban ïohi tang ïa ka tender hapoh ki kot ki sla hynrei u kontraktor uba ïoh u dei ban pyntrei mardor ha shuwa ba ka seng kan shim da kiwei pat ki sienjam,” ong u Bah Jistarland.
