Bhubaneswar, K’lyngkot:
Katba ka nongbah jong ka jylla ka dang pynkhreh na ka bynta ka Swachh Survekshan 2025-26, ka Bhubaneswar Municipal Corporation (BMC) ka la pynbna ba ki skul kiba pynkhuid ïa ki jaka jong ki bad kiba kyntiew ïa ka jingpynsngewthuh ïa ki khynnah skul bad ki nongshong shnong ba marjan halor ka jinglehkhuid bad ki rukom leh khuid kin ïoh ïa ka khusnam.
U Mayor Sulochana Das u la ong ba ïa ki lai tylli ki skul kiba bha tam, kawei kawei na ki Southeast, South west bad North zone ha ka nongbah yn ai khusnam T. 50,000 halor ki kyndon jong ka jingkhuid jingsuba. Haba pynïaid ïa ka jingïalang jong ki nongshim bynta ha shwa ka jingïalang Swachh Survekshan ba la pynlong na ka bynta palat 130 tylli ki skul bad kiwei kiwei ki jaka pule ha ka nongbah, u Das u la kyntu ïa baroh ban pynleit jingmut ha ki lad pynkhuid.
Ka Civic Body ka la kyrpad ruh ïa ki nonghikai skul ba kin shimkhia kyrpang ban pynlong ïa ka sawdong sawkun jong ka skul kaba khuid bad kaba jyrngam. “Ka long kaba donkam ban pynsngewthuh ïa ki khynnah skul jong ki skul bad ruh ban pyntip sha ki kmie ki kpa jong ki,” la ban jur u Mayor.
Ki heh jong ka BMC ki la ïathuh ba ka jingjurip jong ka Swachh Survekshan kan sdang naduh u bnai Rymphang. Ka kynhun pdeng bad ka kynhun kaba lai kin leit jngoh ïa ka nongbah jong ka jylla na ka bynta kane ka jingthmu. Da kaba buh ha ka jingmut ïa ka jingwad bniah, la kyrpad ïa ki nongshong shnong ban bud ryntih ïa ki kyndon jong ka sor halor ka jingkhuid jingsuba bad ka jingpynkhuid jaboh bad ruh ban pynmih ïa ka jingsngewthuh hapdeng kiwei pat, ki la ong.
