Shillong, K’Lyngkot 14
U Myntri ka tnad ka Koit ka Khiah, Bah Wailadmiki Shylla u la pyntikna ba ka Tura Medical College (TMC) kan dei ka shlem pule ka ban pynïaid hi da ka Sorkar, da kaba sangeh noh ïa ki jingthmu ba hashuwa, kata ka rukom treikam lyngba ka Public -Private Partnership (PPP).
Haba ïakren sha ki lad pathai khubor ha ka Sngi Balang, u Bah Shylla u la ong, “Kumba ka long mynta, ngi la rai ba ka Tura Medical College kan dei ka kolej Sorkar (Government Medical College). Ngi la pynsangeh noh ïa ka jingthmu ban pynïaid ïa ka ha ka rukom jong ka ‘PPP Mode’.”
Na ka liang u Myntri, u la kubur ïa ki jingeh ha kaba ïadei bad ka jingthung ïa ki nonghikai, da kaba kdew ïa ka jingduna jong ki doktor kiba long la kloi ban hikai.
“Ka jingeh ka don ha ka liang ki nonghikai, ki doktor ki ban sa hikai hangtei. Kata kan long ka jingeh kaba khraw. Khlem artatien na ka liang jong ngi, ngi dang tynruh ïa kane, hynrei ha kaba kut ka shong ha ka jingdon ki nonghikai kiba ngin sa ïoh,” u la bynrap.
Ka jingthung kam ïa ki nonghikai ka la sdang, bad ka jingpynroi ha ka liang ki jingtei ruh ka la jan dep.
Kane ka rai ban pynlong ïa ka Tura Medical College kum ka shlem pule ba pynïaid hi da ka Sorkar ka wan hadien ka jingsngewkhia bad jingdawa kaba la mih na ki paidbah.
