Shillong, K’Lyngkot 15
U Myntri Rangbah ka Jylla u Conrad K Sangma u la pynbna ba ka Sorkar ka la pynïaid shaid-shaid ha ka jingpyndait ïa ki kor CCTV ha kylleng ka Jylla bad haduh 227 tylli ki kor la dep ban pyndait kum ka jingsdang.
“Nga tharai kumba 70-80 percent ki la dep. Ngin sa sdang sa ïa ka wat kaba ar ha kaba ngin sa pyndait sa 200 tylli” ong u Conrad Sangma.
U Conrad u la pyntip ruh ba ka Sorkar ka la pynbeit ban pyndait kor CCTV bad ki streetlight ha Jowai, Tura bad Shillong, ha kaba ïa ka project la khmih lynti ban pyndep hapoh ka shisnem.
“Kane kan dei ka kam ka ban ïaid shisnem lynter bad ka la ïaid sted bha mynta bad bun ki shnong ki la dep ïoh ïa ka” u la bynrap.
Haba kylli halor ka jinglut ban pyndait kor CCTV, u Conrad u la ban jur ba ka jingsngaiñ bad ka jingïada ki kham long kongsan.
U Myntri Rangbah u la kular ba ka Sorkar kan ïatreilang hajan-hajan bad ki bor shnong kynthup ki Dorbar Shnong ha Shillong ban pynthikna ïa ka jingpyntreikam ba thikna ïa ka project.
