Shillong, K’Lyngkot 15
Ka Hynniewtrep Achick National Movement (HANM) ka la pynrem jur ïa ki riewthrangsnam kiba la pynïap dusmon ïa u Dilseng M. Sangma, u nongïalam seng bhalang, uba la shah pynïap ha ki briew ki bym lah ban tip kyrteng.
Haba kren sha ki lad pathai khubor ha ka 15 tarik u Kyllalyngkot 2026, u Bah Lamphrang Kharbani, President u ong “Kane ka kam kaba shyrkhei bad kaba la pynkyndit ïa ka jingsngew jong ngi bad ka long ka jingshah thombor kaba jur ïa ka jinglong briew, ka jingsuk bad ka hok ha ka imlang sahlang”.
U Bah Lamphrang u la ïathuh ba u Dilseng M. Sangma u dei u nongtrei ha ka imlang ka sahlang uba la aiti lut ïa la ka jingim na ka bynta ka bha ka miat jong ki paidbah bad ban kyntiew ïa ka imlang sahlang.
“Ym dei tang ka jingshah pynïap jong une u paradoh para snam hynrei ha kiba bun ki bynta ka jingshah pynïap ka ju ïai jia man ka por la ka long naduh ki khynnah haduh ki rangbah ruh kumjuh. Da ka jingsngewkhia halor kane, ngi ai jingmut ïa ka Sorkar ban shna noh da ki aiñ kiba khlaiñ ban teh kyndon ïa ki nongpynïap briew ha ka Jylla,”u la ong.
“Ka jaitbynriew kaba rit paid bad lada ka aiñ ka tlot kan sa pynshlur ïa ki riew thrangsnam bad kan nang ïai jia shuh shuh ka jingshah pynïap beiñ,” la bynrap u Bah Lamphrang.
U la ong ba lada ka Sorkar ka shna ki aiñ kiba khlaiñ ki riewthrangsnam ki pyrkhat shispah sien hashuwa ban shim ïa ka jingim jong ki briew.
“Ngi pynpaw ruh ïa ka jingsngewlem kaba khraw ïa ka ïing ka sem u Dilseng Sangma. Ngi kyntu jur ïa ki bor ba dei peit ba kin pynlong ïa ka jingtohkit kaba bniah bad kaba khlem ïashah liang bad pynthikna ba ïa ki nongleh kam sniew yn ithuh bad pynngat ha ka aiñ kloi katba lah,” ong u Bah Lamphrang.
