Shillong, K’Lyngkot 15
U Myntri ka tnad ïalehkai ka Sorkar Jylla u Bah Wailadmiki Shylla u la pynpaw ïa ka jingsngewskhem ba ka Meghalaya ka la ïaid katkum ka por ba la buh ban pynlong ïa ka National Games, ha kaba ki jingtei na ka bynta ki projek bapher bapher ki dangïaid shaphrang.
“Nga la leit ban jurip mynta ka step bad nga la ïohi ba ka kam ka dangïaid shakhmat khnang ban lah ban pyndep ha ka por ba la buh. Ngi dei ban lah ban pyndep shwa ka National Games,” la pynpaw u Bah Shylla ha ki nongthoh khubor ha ka sngi Balang.
Haba kylli halor ka jingïashim bynta jong kiwei pat ki jylla, u Bah Shylla u la ong ba ki dangap ïa ka jingpynskhem da ka jingthoh. “Da ka ktien, ngi la ïakren ïa kane ha ka jingïalang kaba la dep bad ki la pdiang, hynrei ngi danghap ban ïoh da ka jingthoh,” u la bynrap.
Ha kaba ïadei bad ka jinglut jingsep, u Bah Shylla u la ong ba ka dangkloi palat ban ai ïa ka jingkheiñ jingdiah kaba thikna. “Kane ka National Games kam dei tang na ka bynta ki jingïalehkai, ka dei na ka bynta ka jylla Meghalaya baroh kawei, kumta ka dei ka jingpyrshang hapdeng ki tnad treikam. Nga tharai ba ka dangkloi palat ïa nga ban ai ïa phi ïa ka jingmang tyngka kaba thikna halor ki jinglut jingsep,” la bynrap biang u Bah Shylla.
