Shillong, K’Lyngkot 15
Ka Hynñiewtrep Youths’ Development Council (HYDC) ha ka 15 tarik u Kyllalyngkot 2026, ka la pynpaw ïa ka jingbym sngewïahap halor ka jingthmu ka Sorkar Jylla ban bsuh ïa ki kyndon ha ka Immigration and Foreigners Act, 2025, ba kan long ka jingïada na ka jingwan rung kyrthep ki briew ba nabar.
Haba kren sha ki lad pathai khubor ha Shillong Press Club u Bah Wyraiwan Sohtun, President u la ong ba ka jingpyntip na ka liang ka Sorkar Jylla lyngba u Bah Prestone Tynsong, Symbud Myntri Rangbah ba khmih ïa ka tnad Kam-Pohïing ba ka la don ka jingïakren bad u Amit Shah, ba yn bsuh ïa ki kyndon ba syriem kum ka Inner Line Permit ha ka Immigration and Foreigners Act, 2025, ka dei kaba ym ïahap satia.
U la ong ba ka jingbym ai ka Sorkar India ïa kano-kano ka rai ha kaba ïadei bad ka ‘Resolution’ ba la mynjur da ka Ïing Dorbar Thawaiñ ka Jylla hynriew snem mynshwa ban pyntreikam ïa ka Inner Line Permit kaba thmu ban khang ïa ka jingwan rung ki mynder sha ka Jylla, ka dei beit ka jingibeiñ ïa ka Jylla Meghalaya.
Haba ïadei bad ka Immigration and Foreigners Act, 2025, u Bah Wyraiwan Sohtun u ong ba la shu klop lang ïa saw tylli ki Act kiba peit ïa ka jingwan rung na shabar ri.
U la ong ba ka seng kam pyrshah ïa ka jingpyntreikam ïa ka Immigration and Foreigners Act, 2025 ha ka Ri India, hynrei na ka bynta ka Jylla Meghalaya hi ka donkam ïa ka ILP ban tehlakam ïa ka jingwan rung kyrthep ki briew ba nabar.
“Kumba ka Sorkar India ka ai ïa ka jingdawa ILP na kiwei ki Jylla jong ka thaiñ North East, ka dei ruh ban ai ïa ka jingdawa ki paidbah ka Meghalaya” u la ong.
“Ko Sorkar Meghalaya sngewbha nai ïakren kyllaiñ sharum shaneng. Ngi ki paidbah jong ka Jylla ngi lah ngiah lah kdang ïa kane ka jingïaleh politik jong phi hynrei sngewbha batai shai ba hato phin ai ne phim ai ïa ka ILP, kaba la thrang bad kwah shisha da ki nongshong shnong jong ka Jylla Meghalaya,” la bynrap u Bah Wyraiwan.
Kumta u la ong ba ka seng hi ka dawa na ka Sorkar India bad ka Sorkar Meghalaya ba ka dei ban pyntreikam noh mardor ïa ka ILP kaba dei ka aiñ kaba lah ban ïada shisha ïa ka jingwan rung kyrthep jong ki briew ba nabar.
