Shillong, K’Lyngkot 15
U Myntri Rangbah ka Meghalaya u Conrad K Sangma u la pynbna ba ka jingïakren pynbeit pud bad ka Sorkar Assam kan sa bteng bad sdang hadien ba ka la kut ka ilekshon MLA ha Assam, da kaba kdew ba kane ka Sorkar mynta ka dang bunkam bad ki kam ba ïadei bad ka ilekshon.
“Ka ilekshon ka la don hajan, kumta haba kren saiñ pyrthei, ki kam ba hakhmat mynta ha Assam bad ba ka Sorkar ruh kam don ha ka bynta ne ka por ban pynïaid shakhmat ïa ka jingïakren,” la ong u Conrad haba kren sha ki lad pathai khubor ha ka sngi Palei.
Ka bynta kaba ar jong ka jingïakren pynbeit pud ka thmu bad angnud ban pynbeit ïa ki hynriew tylli ki jaka kiba dang sah bad don hapdeng ka jingïakajia pud hapdeng ki ar tylli ki Jylla, kaba la pynbud hadien ka jinglah ban pynbeit ïa ki hynriew tylli ki jaka bad pyndep ïa ka jingsoi ïa ka memorandum of understanding (MoU) ha u snem 2022.
“Shisien ba ka ilekshon ka la kut, kumta ngin sa ïaid biang shakhmat bad ban bteng ïa kane ka kam,” la kular u Myntri Rangbah.
