Shillong, K’Lyngkot 15
U Myntri Rangbah ka Jylla, u Conrad K Sangma, u la pynpaw ba ka long kaba eh ïa ka Sorkar Jylla ban tuklar ïa ka jingkynrum kynram hapoh ka North-Eastern Hill University (NEHU) namar ba ka hap hapoh ka jingpeit jingkhmih jong ka Sorkar Pdeng.
Haba kren halor kane, u Myntri Rangbah u la pynpaw ba ka long kaba sngewsih shibun ban ïohi ïa kaba la jia ha NEHU, namar kane ka la ktah ym tang ïa ki khynnah pule hynrei ka la ktah wat ïa ki nongtrei kumjuh. “Ha kaba kum kane ka por, baroh ki kam ki jam ka skulbah ki la sahkut lut.”
U Conrad u la ïathuh ba u la ïakren bad ki heh Sorkar ba kynthup ïa u Myntri ka tnat Pule Puthi ka Sorkar Pdeng ban wad ïa ka lynti ban pynbeit noh ïa kine ki jingeh. Hynrei, u la pynshai namar ka NEHU ka dei ka shlem pule kaba don hapoh ka jingpeit jingkhmih jong ka Sorkar Pdeng (Central Government), ka Sorkar Jylla ka don hapdeng ka jingeh ban tuklar ha ki kam jong ka.
“Ka bynta jong ngi ka long tang kum ki nongpynïasuk (Mediator) bad kane ka dei kaba ngi la pyrshang ban leh katba lah baroh shi katta. Watla ngi ai ki jingmut bad ki jingpynbeit, ngi donkam ïa ka jingïatreilang na baroh arliang ban ïaid shaphrang. Watla ka long kaba eh ban tuklar pyrshah ïa kane ka kam, hynrei ngi dang pyrshang ban ïada ïa ka jingbit jingbiang jong ki khynnah pule bad ki nongtrei” u la bynrap.
U Conrad u la pyntip ruh ba u Myntri ka tnat Pule Puthi ka Sorkar Jylla u dang ïai-ïakren bad ki heh jong ka NEHU ban pynbeit ïa kane ka ka jingeh. Kawei na ki mat kaba hakhmat eh ba ka Sorkar Jylla ka pyrshang ban ïakren ka long ban khmih ba ki nongtrei ‘Casual’ kin ïoh ïa ka tulop jong ki kaba la sahkut.
U la ong, Kane ka kam ka dei shabar ka bor jong ka Sorkar Jylla (Jurisdiction), hynrei watla katta ka Sorkar Jylla ka khlem kheiñ sting ban pynbeit, ka ïai-ïaleh ban pynbeit kloi katba lah ïa kane ka kam.
