Shillong, K’Lyngkot 15
Ka Golflink XI Star bad ka Matrisangha ki la khur ïa ka jingjop ha ka lympung ïalehkai Second Division Cricket League 2026 ha ka sngi Palei ha madan Urkaliar, Shillong.
Ha kane ka jingïakhun ba la pynïaid da ka Shillong Cricket Association, ka Golflink XI Star ka la pynliem noh ïa ka Sportive CC da 4 run. Ka Golflink XI ka la kam trai ban tied nyngkong ha kaba ka la kamai 157 run bad shah pynhap 5 wiket ha ki 20 over. U Ankit Singh Rathore u la lah ban pynpaw ïa ka jingtbit da kaba u la lah ban kamai 63 run na ki 55 bol bad u Prem Mahato u la ïoh 35 run na ki 20 bol. Ïa ki 2 wiket la khur da u Kishan bad u Suresh na ka bynta ka Sportive.
Haba wan ban beh ïa ka thong, ka Sportive ka la kamai tang 153 run bad shah pynhap 8 wiket ha ki 20 over. U Ravi Kumar u la khyrwit ïa ka shiteng spah kaba 58 run na ki 31 bol bad u Kishan Das u la ïoh 35 run na ki 28 bol. U Pritam Singh u la khur 3 wiket bad ïa ki 2 wiket la ïoh da u Prem Mahato na ka bynta ka Golflink. Ïa ka nam Player of the Match la khur da u Pritam Singh.
Haba phai sha kawei pat ka jingïakhun kaba ar, ka Matrisangha ka la jop da 3 run ïa ka Sanmer CC. Ka Matrisangha kaba la shimti ban tied nyngkong, ka la kamai 200 run bad shah pynhap 4 wiket ha ki 20 over. Kane ka la wan lyngba ka jingïalehkai bha u Sajan Maghaiya uba la ïoh ban khyrwit 114 run na ki 52 bol bad u Snehal Dutta u la ïoh 21 run na ki 16 bol. Katba u Pynshngaiñ Dkhar bad u Wadbir Shadap ki la khur mar 1 wiket na ka bynta ka Sanmer.
Haba wan shimti ïa ka pali kaba ar, ki nongtied kim shym la lah ban kynjoh sha ka thong ha kaba ka la kamai tang 197 run bad shah pynhap 9 wiket ha ki 20 over. U John Kharbub-nah u la tied 44 run na ki 21 bol bad u Pynshngaiñ Dkhar u la ïoh 35 run na ki 19 bol. Katba u Kishor Bhowmick u la khur 5 wiket bad ïa ki 2 wiket la khur da u Sajan Maghaiya, uba la khur ruh ïa ka nam Player of the Match.
