Shillong, K’Lyngkot 15
U Myntri Rangbah ka Jylla Conrad K Sangma u la pynpaw ïa ka jinglong ba kloi ban pynsdang biang ïa ka jingïakren ïasuk bad ka Hynñiewtrep National Liberation Council (HNLC) ka seng kiengatiar hynrei u la ban jur ïa ka jingdonkam ban shimkhia bad ïatreilang na baroh ki kynhun ba don bynta.
Haba jubab ïa ka jingkylli la ka Sorkar kan khot biang ïa ka HNLC sha ka miej ïakren ïasuk, u Conrad u la ong, “Ngin hap ban shong bishar ïa kane ka bynta namar ki don ki plus bad minus, ka daw balei ba kim kwah ban bteng ha ki snem ba la leit bad hooid ngi hap ban khot lang ïa ka Sorkar India”.
“Kine ki jait kam ki dei satia kita kiba ngi lah ban sdang eiei mynta bad pynsangeh noh lashai. Ka don da ka lynti bad ki don bun ki kynhun ba don bynta, ki don bun ki bor Sorkar ba don bynta bad ki don shibun ki jingpynkhreh ba hap ban leh bad kumta, ngi donkam ban ïasyllok bad baroh,” u la bynrap.
U Conrad u la ong, “Ïa ngi, ka jingsuk ka long kaba kongsan, bad ngi kwah ban ïohi ïa ka jingsuk ba neh slem hangne ha Meghalaya. Na nga kum u Myntri Rangbah, kaei ka lynti ba hap ban shim nga long uba khreh ban pynïaid shakhmat hynrei ngi donkam ïa ka jingshimkhia bad ka jingïatreilang bad ka jingkut jingmut na baroh ban lah pynurlong ïa kane ka kam bad ban peit ba ngi kut ha ka lynti kaba dei”.
Haba ïadei bad ka kyndon ba buh da ka HNLC ban map noh ïa baroh ki kam bymman hashuwa ba kan mynjur ban sdang biang ïa ka jingïakren ïasuk, u Conrad u la ong, “Kane ka dei kata kaba nga kren, ngam lah ban ong eiei ïa mynta, nga hap ban khmih ïa ka….ngim pat shim satia ïa kano-kano ka rai halor kane”.
U Myntri Rangbah u la kular ba ka Sorkar kala shimkhia ïa ki jingbyrngem ïa ki nongïalam saiñ pyrthei, kynthup ïa u President ka VPP Bah Ardent M Basaiawmoit.
“Ngi ju shimkhia beit ïa baroh kine kiei-kiei namar ka dei ka kam kaba khia bha. Ka jingbyrngem ïano-ïano ka dei ka kam ka bym lah ban pdiang da ka Sorkar,” u la ong.
