Shillong, K’Lyngkot 15
Ka lympung ïalehkai Women’s Football League 2026 ba la pynïaid da ka Shillong Sports Association (SSA) ka la jam sha ka quarter final ha kaba ki phra tylli ki kynhun kin hap ban ïaknieh na ka bynta ban kynjoh sha ka nam lahduh mynta u snem.
Ki kynhun kiba la rung sha ka quarter final ki long ka Laitkor SC bad ka Umrynjah SC kiba na Group-A, ka PFR FC bad Lumparing SC na ka Group-B, ka New Challenger FC bad ka Rangdajied United na ka Group-C. Katba ki ar tylli ki kynhun kiba la wan ha ki kyrdan balai (third best team) ki long ka Nongthymmai SC (Group-A) bad ka Lawei (Group-B).
Te kumta ka jingïakhun quarter final kan sdang mynta ka sngi Thohdieng ha kaba ka Laitkor kan ïakhun pyrshah ïa ka Umrynjah ha ka por 11 baje mynstep bad ka Rangdajied United ïa ka Lawei ha ka por 1:30 mynsngi. Ha ka sngi Saitjaiñ ka Lumparing kan ïakynduh pyrshah ïa ka Nongthymmai ha ka por 11 baje mynstep bad ka PFR ïa ka New Challenger ha ka por 1:30 mynsngi. Ïa kine ki jingïakhun yn pynlong ha SSA Stadium.
Na ka liang ki bor pynïaid ka SSA ki la pynbna ba ïa ki jingïakhun semi final yn pynlong ha ka 17 tarik bad ka final yn pynlong ha ka 24 tarik.
