Shillong, K’Lyngkot 15
U Myntri Rangbah ka Jylla Conrad K Sangma u la ban jur ïa ka jingdonkam ban don ka jingïamynjur lang da baroh halor ka projek lynti rel ha ri-lum Khasi-Jaiñtia bad ong, “Ngi la kren shai, ngin jam shakhmat satang lada ngi la dep ïasyllok bad ïoh ïa ka jingmynjur jong baroh”.
Ha ka jingïakynduh bad ki lad pathai khubor ha ka sngi Palei, u Conrad u la pynpaw ïa ka jingbynñiaw ba bun na ki seng saiñ pyrthei ki khlem wan ïashimbynta ha ka jingïalang jong baroh ki seng saiñ pyrthei (All Party meeting) ban ïakren halor kane ka kam.
U Conrad u la kyntu ïa ki seng Liang Pyrshah ban wan lang noh sha ka jingïasyllok, bad ong, “La ngi mynjur ne ngim mynjur, satang lada ngim kwah ïakren, da lei lei ruh ngin ym poi shano-shano”.
U Conrad u la ïai ban ïa ka jingkut jingmut jong ka Sorkar ban pynlong ïa ka jingïakren bad baroh ki kynhun ba don bynta, haba batai “Ngin ïai bteng ban pynsngewthuh ïa ki paidbah halor ki jingmyntoi jong kane bad ngin pyrshang ban leh eiei halor ki jingsngewkhia kaba ki lah ban don bad ngin peit la ngi lah ban poi sha ka jingshim rai bad hadien kane ngin sa lah ban leit ïakren sha Delhi”.
U la ban jur ba ka projek lynti rel ka long kongsan bha ha ka ïoh ka kot hynrei u la kubur ïa ka jinghap long husiar bha, kaba donkam ban bishar bniah thik pa thik.
Ka Sorkar ka la thaw ïa ka All-Party Committee ban ïakren ïa ka projek lynti rel, hynrei katto katne ki seng saiñ pyrthei kila kyntait ban ïashimbynta.
