Shillong, K’Lyngkot 15
Ha ka 15 tarik u Kyllalyngkot 2026 ka mala ba ha jrong jong ka shlem pule Shillong Government College of Engineering kaba don ha Mawlai Kynton Massar ka la julor namar ka jingpluh ding kynsan kaba la jia ha ka por 7 shiteng eiei mynstep.
Haba ïoh ban ïakren ïa u Principal u Prof. C Myrthong u la ïathuh ba u la ïoh jingtip ïa katei ka jingjia na u showkidar jong katei ka shlem pule uba pyntip ba ka kamra ka mih tdem. U la ïathuh ba ka kamra kaba jia ka jingpluh ding ka dei ka kamra, ba pyndonkam ka Sports Department ban buh tiar.
Shuh-shuh u la ïathuh ba ka jingjia pluh ka sdang na katei ka kamra bad ym lah ban tip ïa ka daw jong ka jingkem ding hynrei la suba ba lehse ka dei na ka daw ka jingthud ka bording.
U la ïathuh ba ki la pyrshang ban pynlip ïa ka ding hynrei namar ka jingkhang tala ïa katei ka kamra ym lah leh eiei bad kham hadien ka ding ka la sdang ban heh bad pur sha kiwei pat ki kamra, kumta u la pyntip sha ka ‘Fire & Emergency Service’ bad ki la wanpoi ha katei ka jaka ban pynlip ïa ka ding bad ka la shimpor haduh shi kynta shiteng ban pynlip ïa ka ding.
U Prof. Myrthong u la pynthikna ba kam shym la don kano-kano ka jingjia ba sngewsih lait noh ka jingjulor ki kynroh bad ka jingduh noh ïa ki tiar bad ki mar ki mata jong ka ‘Sports Department’ kiba don hapoh jong ka kamra.
Shuh-shuh u la ong ïa kaba mynta kam don jingktah eiei haba ïadei bad ka jingpule jong ki khynnah pule namar ba ki dang don kiwei ki kamra bad ba ki samla pule ki dang don tang ka ‘batch’ ba nyngkong. Hynrei u la kyntu pat ïa ka tnad ba dei peit ba kan shimkhia ban pynkloi ïa ka jingmaramot ïa ki bynta ba la julor khnang ba kan ym buh jingeh ha ki sngi ban wan.
U la ïathuh ruh ba haba ïadei bad kane ka jingjia ki pulit ka thanad Mawlai ki la wan poi ban pynlong ïa ka jingtohkit.
