Shillong, K’Lyngkot 15
Ka heprit Hanna Kandara Warjri kaba dang 11 snem ka rta kaba shong ba sah ha Malki, Shillong kaba dang pule class-7 ha Loreto Convent School Shillong ka la poi sha ka Top-10 ha ka jingïakop tem guitar jong ki kynthei.
Kane ka jingïakop tem guitar ka dei kaba la tip kum ka She Shreds India’s Online Female Lead Guitarist Contest kaba la pynïaid da ka Guitar Gear Gyan kaba la sdang naduh u bnai Nohprah bad mynta ka kynti ka la poi sha ka Top-10.
Ha kane ka Top-10 ki nongpynïaid kin jied satang san ngut ban rah ïa ka jingjop da kaba kheiñ 25 percent na ka vote bad 75 percent na ki nongbishar.
Ha ka voting pat kan kut ha ka 21 tarik mynta u bnai da kaba ñion ïa ka kyrteng jong ka Hanna Kandara Warjri lyngba ka online.
Ban tip kham bniah U Nongsaiñ Hima u la ïoh ban ïakynduh kyrpang bad ka Hanna Kandara Warji ha ïingsah ha Malki.
Ka Hanna ka la ïathuh ba ka la ïohi ïa kane ka jingïakop da kaba phah ki nonghikai ha jaka hikai tem bad la ïoh ban rung ha ka bynta kaba nyngkong da kaba phah ïa ka video kaba 30 second.
Ka la ïathuh ba ka la don kane ka sap ban tem ka dei naduh dangrit ha ka por ba dang dap 3 snem ka rta.
“Haba I mei bad I pa ki ïalam kai sha Khyndailad bad Laitumkhrah, nga ju kwah ban rung ha ki jaka die ïa ki jingtem tangba kim pat shah hynrei ki la thied ïa nga da ka guitar ba shu lehkai hynrei nga la bret noh namar nga kwah da ka guitar ba shisha,” ka la pynpaw.
Ka la ïathuh haba ka kmie bad u kpa ki la thied ïa ka guitar ba shisha ka la sdang ban tem tangba kam pat nang bha bad ka la sdang ban nang dei naduh ba leit ha jaka hikai ba kyrpang.
Ka la ïathuh ba ka nang ruh ban tem duitara ha jaka hikai bad ïa ka piano ka la nang ban tem namar ka ïohi ba tem ka hynmen ha ïing.
Shuh shuh ka la ïathuh ba watla ka kwah ban tem hynrei ka la bate ïa ka por ban khreh kot.
Nangta ka la ïathuh ba ka ju sngewtynnad ban ïalehkai basketball bad jngi tangba ïa kine ka pynlut ka por ha ka sngi shuti bad sngi Saitjaiñ.
Ka Hanna ka don jingkyrmen ban poi sha ka Top-5 ban rah ïa ka khusnam jingjop da ka jingkyrshan ki paidbah lyngba ka vote.
