Vijayawada, K’lyngkot:
Ka sorkar pdeng ka la pyllait ïa ka bynta ba khatduh jong ka pisa ba la ai jingmut da ka 15th Finance Commission na ka bynta ka koit ka khiah jong ka Andhra Pradesh.
Ïa kane ka jingïarap, kaba kot sha ka T.567.40 klur, la mynjur ha ka lah sngi U Blei, kaba la pynpoi ïa ka jingmang pisa jong ka jylla hapoh ka Commission sha ka T.2,600 klur.
U Myntri ka Koit ka Khiah u Y Satyakumar Yadav u la pynbna ïa kane ka jingpynlait ha ka kyrwoh khubor ha ka sngi Ba-ar, da kaba pynpaw ïa ka jingsngewkmen ba ka AP ka la kylla long ka Jylla kaba lai ha ka ri, hadien ka Tamil Nadu bad Tripura, ban ïoh pura ïa ka bhah jong ka na ki Grant jong ka Finance Commission na ka bynta ka koit ka khiah. U la batai ïa kane ka jingpynjari kum ka jingithuh ïa ka jingpyrshang jong ka sorkar NDA ha kine ki 19 bnai ba la dep ban pynkhlaiñ ïa ka tnad ka koit ka khiah.
Ïa kane ka pisa yn pyndonkam na ka bynta ban tei ïa ki Ayushman Health Mandir, ki PHC, bad ki Community Health Centre, ban kyntiew ïa ki jingshakri ban lap ïa ki jingpang, bad ban seng ïa ki jaka sumar paidbah ha ka kyrdan jong ki block. Na ka pisa ba la pyllait, la mang T.233.45 klur na ka bynta ban tei ïa ki jaka sumar, T.218.11 klur na ka bynta ki jingtei ban lap ïa ki jingpang, T.55.89 klur na ka bynta ki jaka sumar nongkyndong, bad T.52.71 klur na ka bynta ki jingshakri ha sor.
U Myntri u la bthah ïa ki heh sorkar ban pynthikna ïa ka jingpyndonkam pura ïa ka jingïarap jong ka pdeng ha ka bynta kaba lai, da kaba maham ba ki jingduna ha kaba ïoh ïa ka pisa kin wanrah ïa ki lad jingkitkhlieh.
Ki heh sorkar ki ïathuh ba haduh mynta, la pyllait T.2,033 klur, na kaba T.1,896 klur la pynlut. Kaba kham pawnam ka long ba 43% na ka pisa baroh bad 48% na ka jingpynlut ka la jia ha ka por jong ka sorkar synrop kaba 19 bnai, kaba pyni ïa ka jingpyntreikam kaba stet haba ïanujor bad ka jingsynshar barim.
Ka tnat ka Koit ka Khiah ka la shimkhia ban tei ïa ki 1,467 tylli ki ïing jong ka Ayushman Health Mandir, 100 tylli ki Primary Health Centre, bad 7 tylli ki Community Health Centre, kaba pynsted ïa ki projek kiba la mad ïa ka jingdkoh.
