Shillong, K’Lyngkot 15
Ka All India Football Federation (AIFF) ka la khmih lynti ba kan pyndep ïa ka jingsoi ïa ka Amelia Valverde kum ka coach hadien ba kane ka nonghikai kaba na Costa Rica ka la pdiang ïa ka jingtyrwa ha ka por kaba lyngkot ban shimti ïa ka kynhun ki ‘thei ïalehkai ka India na ka bynta ka AFC Women’s Asian Cup 2026 ka ban long ha Australia.
Ka Valverde, kaba 39 snem ka rta, ka la bat arsien kum ka coach ïa ka Costa Rica ha ka FIFA Women’s World Cup ha u snem 2015 bad 2023. Ka jingïasoi kontrak hapdeng kine ki arliang mamla, la khmih lynti ba kan long ha ki 48 kynta ban wan.
Katkum ki khubor, la ong ba ka jingshemphang jong ka Valverde ban pynïaid na ka bynta ki lympung kiba heh bad ka jingtbit jong ka ki la pynlong ïa ka AIFF ba kan tyrwa ïa ka ban shimti ïa kane ka kynhun. Ka AFC Women’s Asian Cup Australia 2026, kaba la thmu ban long ha kylleng ki lai tylli ki nongbah naduh ka 1 tarik haduh 21 tarik u Lber, kin don 12 tylli ki kynhun ryngkat kiwei pat ki phra tylli ki kynhun kiba don ha ki kyrdan ba hakhlieh na ka bynta ban ïoh rung sha ka FIFA World Cup ha Brazil.
“Ka kynhun jong ki kynthei ka don ka lad ban rung sha ka World Cup bad ka long kaba kongsan ban leh ïa kano kano ka kam ban ïarap ïa ki nongïalehkai phutbol,” ong uwei na ki dkhot ka AIFF ha ka sngi Balang. “Phra na ki 12 tylli ki kynhun kiba rung sha ka quarter final kin don ha ka jingïakhun ban ïoh jaka na ka bynta ka World Cup. Ka India ka la don ha katei ka thup bad ka donkam ban ïaknieh ban ïoh rung.”
Watla ka la don ha ka kyrdan ba 67, ka India ka la shah pynngat ryngkat ka Japan (world No 7), Vietnam (37), bad ka Chinese Taipei (42).
Ka jingthung ïa ka Valverde kan long ka jingduhnong ïa u coach u Crispin Chhetri, uba la pynïaid ïa ka kynhun ïalehkai ka India ha kaba kynthup ïa ka jingjop kaba phylla pyrshah ïa ka Thailand kaba la shim bynta teng ha ka World Cup. “U Crispin un dang bteng bad ka kynhun”, la ong uwei na ki heh ka AIFF.
Ka coach naduh ba ka la dap 25 snem ka rta, ka Valverde ka la don lang bad ka kynhun ïalehkai jong ka Costa Rica naduh u snem 2011 bad ka la shimti ïa ka kam ba hakhlieh duh ha kaba sdang jong u snem 2015 hadien ba u coach u Garabet Avedissian u la ïehnoh ïa ka kam.
Ha katei ka jingïakhun ka Costa Rica ka la ïakhaid pyrshah ïa ka Spain bad ka South Korea bad tang khyndiat eh ka la duh ban rung sha ka pre-quarter final hadien ba ka Brazil ka la thep ïa ka kol ha ka minit kaba 83 na ka bynta ban khur jingjop.
Ka Costa Rica ka la duh rung sha ka World Cup ha u 2019, hynrei ka la ïoh ïa ka kyrdan ha u 2023, ha kaba ka la shah rem ha ka Japan, Spain bad Zambia ha ka jingïalehkai group.
