Shillong, K’Lyngkot 15
Uwei u heh shipai BSF u la shah khot hajir ha u Inspector General (IG) bad la bthah ba un panmap hadien ba la kynnoh ba u la thombor ïa u wei u nongthoh khubor, u Raju Das jong ka Assam Tribune ha ka ktem jong ki shipai BSF Umpling ha ka sngi Palei.
Kane ka jingjia ka la jia ha ka por ba u Raja Das bad kiwei kiwei ki nongthoh khubor ki dang lum jingtip halor ka jingkhihwin hapoh ka Campus kaba ïadei bad ka jingpynkut noh ïa ka kam jong u wei u BSF.
La ïathuh ba utei u heh shipai, uba ym pat lah ban pynpaw, u la shoh ïa u Raja Das, da ka mobile phone jong u bad pyrshang ban shim ïa ka suloi na u wei pat u BSF, kaba la pynmih ïa ka jingtieng ïa ka jingshngaiñ jong u nongthoh khubor.
U President ka Shillong Press Club (SPC) u Bah Deimaia Siangshai u la rah ïa kane ka kam sha u IG jong ka BSF bad u ophisar ba dei peit ïa ki kam paidbah (PRO), bad na ka liang jong u IG u la bthah ïa une u ophisar ban panmap halor kane ka jingleh jong u.
Ki nongthoh khubor kiba trei ha Shillong ki la pynrem jur ïa katei ka jingjia da kaba pynksan ïa ka jingdonkam jong ki nongthoh khubor ba kin lah ban trei khlem da sheptieng ïa ka jingshah pyntieng ne shah thombor.
