Mawkyrwat, K’Lyngkot 15
U MLA/MDC ka Ranikor Constituency Bah Pius Marweiñ uba dei ruh u President jong ka Southern Border Sports Association, ha ka sngi Palei u la plie ïa ka Ranikor Constituency Week 2026 ha Nonghyllam, South West Khasi Hills District.
Kane ka dei ka sien kaba ar ba na ka liang katei ka synjuk ka la pynlong ïa ka Ranikor Constituency Week kum shi bynta ban kyntiew bad pynshlur ïa ki khun samla ka Ranikor Constituency ha ki jingïalehkai bad ban pyni ïa ki sap bapher bapher.
Ha kane ka sngi sdang la pynlong ïa ka jing ïakob mareh marathon ha kaba u Bah Pius u la plie pyrda ïa ka bad ki jingïalehkai ki ban sa pynlong ki long ka Football, Volleyball, Dancing Competition, Miss Ranikor, Arm Wrestling, Singing Competition bad kiwei kiwei.
Ha kane ka marathon ki la don kumba 150 ngut kiba la wan ban ïashim bynta kynthup naduh ki khynnah, samla bad wat ki rangbah.
Ïa ka kyrdan ba nyngkong ha ki senior jong ki shynrang la jop da u Finalbonson Syiemlieh katba jong ha ka liang ki kynthei la jop da ka Banpynshai Syiemlieh. Ha ka junior ki shynrang la rah da u Johnfarban Mawleiñ bad ka Kyntiewdor Thongni.
Ïa kane Week yn sa pynkut noh ha ka sngi Thohdieng bad ha kane ka sngi yn sa ïoh ruh ban sam ïa ki khusnam da ka song pisa bad ki syrnod sha baroh ki nongjop ha ki jingïalehkai bapher bapher.
