Shillong, K’Lyngkot 15
U Myntri Rangbah ka Jylla Conrad K Sangma u la pynbna ba ka Sorkar ka long kaba kloi ban ïakren halor ka kaiphod jong ka Expert Committee on State Reservation Policy, kaba la khmih lynti ban sa wanrah ha ka Dorbar ban wan ka ïingdorbar thawaiñ.
“Ngin sa lah ban pynbna paidbah ynda ngi lah wanrah hapoh ka ïingdorbar thawaiñ ka ban sa long shen. Nga thikna ba ngin lah ban wanrah ïa kiei kiei baroh ha ïingdorbar thawaiñ,” la ong u Conrad haba ïakren bad ki lad pathai khubor ha ka sngi Palei.
U Conrad u la batai ba ka daw ba slem ban pyllait ïa ka kaiphod ka dei namar ka jingkyllaiñ bad ka jingjrong, kaba donkam ban hap bishar thik pa thik. “Ka dei ka kaiphod kaba jrong bha-da ki hajar
hajar ki sla ki don. Man ki kyntien ki long kiba kongsan ha ka, kumta kam long kaba lah ïa ngi ban shu ai tang ïa ki pasoh jong kiei kiei baroh,” u la bynrap.
U Myntri Rangbah u la kular ba ka Kynhun Myntri kan sa ïakren shen ïa kane ka kaiphod, lehse ha ka jingïalang ban sa wan.
“Ngin shong ïa ka jingïalang ka Kynhun Myntri lashai ka sngi Thohdieng bad lehse ngi lah ban ïakren ïa kane. Kumta, hapoh ka shitaiew lane shiphew sngi, ngin sa lah ban pynbna,” ong u Conrad.
