Chennai, K’lyngkot:
Ka jingpang Malaria ha ka jylla ka la hiar sha ka 321 ngut ha u snem ba la lah na ka 5,587 ngut ha u snem 2015, bad na ki 38 tylli ki distrik, 33 tylli ki distrik kim don shuh kiba ïoh ïa ka jingpang Malaria, kane ka long katkum ka jingkheiñ ba la pyllait da ka Directorate of Public Health and Preventive Medicine ha ka sngi Ba-ar.
Katkum ka jinglum jingkheiñ, kine ki 33 tylli ki distrik ki kynthup ïa ka Kancheepuram, Tiruvallur, Vellore, Tirupattur, Ranipet, Tiruvannamalai, Cuddalore, Villupuram, Kallakurichi bad Thanjavur.
Ka tnat ka koit ka khiah ka dang shim ïa baroh ki lad ki lynti ban pynpoi ïa ki nongpang sha ka zero ha ki san tylli ki distrik kiba dang sah kata ka dei ka Chennai, Chengalpattu, Ramanathapuram, Thoothukudi bad Salem.
Kine ki san tylli ki distrik ki la don ha ka kyrdan ‘Category I’ ha kine ki san snem ba la dep.
Ka tnad ka koit ka khiah ka la shim ïa ki lad jingïada kum ka jingpeitngor ïa ka jingpang Malaria.
Ka kam wad bniah ïa ki jingpang ka dang ïaid shakhmat ha ki Primary Health Centre (PHCs) bad ïa ki nongpang ba la lap ba ki don ïa ka jingpang Malaria la ai jingsumar pura bad la buddien bha ïa ki.
Ki nongtrei ka koit ka khiah ki dang leit ruh sha ki shnong kiba la shah ktah ha ka jingpang Malaria bad ki dang pynlong ruh ïa ki lad jingïada. La buddien bha ïa ki nongbylla sngi na ki jylla ba marjan kiba shah ktah ha ka jingpang Malaria.
Ka National Seminar halor “Ka jingpynduh ïa ka jingpang khlam na Tamil Nadu” la buh ban pynlong naduh ka 19 haduh ka 21 tarik u Kyllalyngkot bad ka Central Committee jong ka National Vector-Borne Disease Prevention Programme kan pynlong ïa ka jingïalang bishar bniah na ka bynta ban pynduh ïa ka jingpang ha Tamil Nadu, ong ka khubor.
Ka jingpang Malaria ka mih na ki khñiang jingpang kum u Plasmodium vivax (P.vivax) bad u Plasmodium falciparum (P.falciparum) ba la pynsaphriang da ki pyrjong.
Ka World Health Organization and National Centre for Disease Control ki la buh thong ban pynduh jait ïa ka jingpang Malaria na India ha u snem 2030.
