Guwahati, K’lyngkot:
U President barim jong ka All Assam Minorities Students’ Union (AAMSU), u Rejaul Karim Sarkar, u la iehnoh ïa ka kam na ka Indian National Congress, da kaba kynnoh ba ki don ka ïapher jingmut bad ka akor kaba jur bha bad ki nongïalam ba hakhlieh duh jong katei ka seng ha Assam.
Ha ka shithi iehnoh kam jong u ha ka 14 tarik u Kyllalyngkot, 2026, kaba la thoh sha u President jong ka Assam Pradesh Congress Committee (APCC), u Gaurav Gogoi, u Sarkar u la ong ba u la rung sha ka Congress da ka jingpynshlur na ka jinglong pyrthei jong ka, ka jingmut jingpyrkhat kaba kynthup lang bad ka jingkohnguh ha ki nongrim jong ka Riti synshar ka ri.
Hynrei, u Sarkar u la pynpaw ba ki jingkren ba dang shen bad ki nongrim paidbah ba la shim da ki nongïalam ba rangbah jong ka Congress, khamtam eh ki nongïalam jong ka Assam Congress Legislature Party, u Debabrata Saikia bad u MP ka Nagaon, u Pradyut Bordoloi, ki la pynlong ïa u ban “sngewsih jur ha ka akor bad ka jingmut jingpyrkhat” bad ki la pynduh mynsiem ïa u da kaba pynbudnam sniew ïa u.
Ha ka shithi kaba la thoh da ki kyntien kiba tyngeh, u Sarkar u la kynnoh ba ka jingïeng jong kitei ki arngut ki nongïalam ha ki mat ba dang shen ka la pynlong ïa u ban ym lah ban bteng ha ka seng.
U la ïathuh shuh shuh ba ka jingleh jong ki ka ïasyriem bad ka jingleh jong ki “agent jong ka BJP”, da kaba pynpaw ba ka jingdon jong ki hapoh ka seng ka la pynbor ïa u ban shim ïa ka rai ban iehnohkam.
