London, K’lyngkot:
Ka Britain ha ka Sngi Balang ka la pyntip ba la khang khyrdep noh shipor ia ka tnat Embassy jong ka UK hapoh Iran, namar ki kynrum- kynram bad ka jingbym shngaiñ ka jinglong- jingman ha katei ka ri ha kine ki sngi.
Na kane ka daw, u nongrah ktien ka sorkar UK, u la ong “Ngi la khang shipor ïa ka British Embassy ha Iran, kane kan treikam mynta na jngai. Mynta la pynthymmai ïa ki jingai jingmut shaphang ka jingleit jingwan jong ka Ophis bar ri ban pyni ïa kane ka jingkylla ha ka kam consular.”
U nongmihkhmat jong ka ri Bilat bad baroh ki nongtrei jong katei ka tnat, la pynkynriah noh shwa shipor katba dang bishar bniah ia ka jingshngaiñ bad ka rai ban buh hakhmat eh ia ka jingshngain jong ki nongtrei, la ong u heh jong ka ri Bilat.
Kane ka sienjam ka long ha ka por ba ki nongïalam ka Iran ki pyrshang ban pynjem ïa ka jingkulmar kaba shyrkhei tam hapoh ka ri kaba ka Islamic Republic ka la ïakynduh, bad ha kaba u President ka U.S. U Donald Trump u la byrngem ban tuklar.
Ka Britain bad ka America, ki la pynkynriah noh ïa ki katto- katne ngut ki briew na ki ktem ha Middle East, hadien ba uwei u heh ophisar jong ka Iran, u la ong ba ka Iran, ka la maham ïa ki ri ba marjan, ba kan hiar thma ïa ki ktem jong ka America, lada ka US kan hiar thma ia ka Iran.
