Shillong, K’Lyngkot 16
U Myntri Rangbah ka Jylla, u Conrad K. Sangma ha ka Sngi Thohdieng u la ong ba ka Sorkar Jylla ka long kaba kloi ban bishar bniah ïa ki kam ba ïadei bad ki nonghikai ba ngat ha ka jingthohbria – (kiba la kynnoh donkti) ha ka jingthungkam ‘Assistant Teacher’ ha ki skul ‘Lower Primary’ ha u snem 2008.
Haba kren sha ki lad pathai khubor, u Sangma u la ong ba ka Sorkar ka la pan rai na ka ‘Supreme Court’ lane ‘High Court’ ban bishar bniah biang ïa ki mukotduma sa shisien.
“Ngi kyrpad ïa ka ‘Supreme Court’ ne ka ‘High Court’ ban ai ha ngi ïa ka rai ne ka jingbit la ngi lah ne em ban bishar bniah biang sa shisien ïa kane bad ngin jyn da la kmen eh ban bishar bniah biang ïa ka. Lada don ki mukotduma kiba shong hok bad lada don ki briew kiba la shah ktah ha ka rukom ka bym dei, khlem pep, ngi kwah ban bishar bniah ïa kata,” u la pynpaw.
U Myntri Rangbah ka Jylla u la jubab ïa ka jingkylli halor ka jinglong-jingman jong ki nonghikai ba la ngat ha ka jingthohbria hadien ka rai jong ka Meghalaya High Court ha ka 4 tarik Nailur, 2025, kaba la pyndam noh ïa ki jingkynnoh pyrshah ïa ka Myntri barim ka tnad pule-puthi, Dr. M. Ampareen Lyngdoh, Director barim ka Elementary & Mass Education, J.D. Sangma, bad Deputy Director barim, Ameka I. Lyngdoh.
U Myntri Rangbah u la pyntikna ba ka Sorkar ka dang ïakren bad ki nonghikai bad ka dang khmih ïa ki lad ki lynti kumno ban ïaid shakhmat bad kane.
“Nga la bthah ïa u Chief Secretary ban bishar bniah ïa ka lad bad u dang khmih ïa kane ka kam bad peit kumno ngi lah ban ïaid shakhmat halor kane ka bynta,” la bynrap u Sangma.
Shuh shuh, u Myntri Rangbah u la pyntip ba kumba 140 ngut ki nonghikai ki la shah thung kam biang kham mynshuwa.
“Lada phi kynmaw, man la ka por ba ka ‘Supreme Court’ ne ‘High Court’ ka la ai sha ngi ïa ka lad ban bishar bniah, ngi la bishar bniah. La kumno-kumno, kumba 140 ngut ki nonghikai ki la shah thung biang ha ka jingbishar bniah kaba nyngkong, bad ngi la lap ba kim don eiei shisha ha kane ka bynta,” u la ong.
