Shillong, K’Lyngkot 16
Ki bor pynïaid jong ka National Institute of Technology Sohra (NIT) ki la kular ban pynkut noh ïa ka jingïasoi kontrak bad ka North Eastern Security Service Pvt Ltd (NESS) hadien ba ka Hynñiewtrep National Youth Front (HNYF), South East Circle ka la ujor sha u Director pyrshah ïa kane ka Agency.
U nongaiktien ka HNYF u Bah Banjop Khongwir, u la ïathuh ba ka jingleit ka seng ban ujor sha u Director ka NIT, ka dei halor ba ka NESS ka la pyndonkam bakla ïa ka ‘trading licence’ ba la ai da ka Khasi Hills Autonomous District Council, kumjuh ruh ba ka la pynkheiñ ïa ki kyndon treikam.
U la ong ruh ba ka NESS kam shym la ïoh ïa ka No Objection Certificate (NOC) na u Sordar ka Elaka Saitsohpen Sohra bad ka la thep tender ruh da kaba pyndonkam ïa ka ‘Trading Licence’ ba la ïoh na ka bynta ban pynïaid ïa ka Director General of the Assam Rifles (DGAR) Laitkor.
“Ka NESS ka la pynkheiñ ïa ki kyndon Elaka da kaba ka la ïaidlait khlem da ïoh ïa ka NOC na u Sordar Elaka bad ka la pyndonkam bakla ïa ka ‘Trading Licence’. Kane ka long ba ka NESS ka la khñiot ïa ka hok bad ka bor jong ki jaidbynriew rit paid (indigenous rights).” la ong u Bah Banjop.
Shuh-shuh u la ïathuh ba na ka liang jong ka NIT Sohra ka la kubur halor kane ka jingdawa ka HNYF, bad ka la dawa ba ka NIT ka dei ban pynduh noh mardor ïa ka kontrak bad ka NESS, khnang ban pynthikna ba baroh ki tnad treikam ba ïatreilang bad ka NIT ki dei ban bud ïa ki aiñ bad ki riti dustur.
“Ngi khmih lynti ba ka tnad pule kan shim ïa ka sienjam kaba kloi khnang ban ym mih kano-kano ka jingkulmar ha ka thaiñ,” u la bynrap.
