Shillong, K’Lyngkot 16
Ka All Meghalaya Contractor and Supplier Association (AMCSA) kaba la ithuh da ka Sorkar bad ki tnad bapher-bapher bad kaba ju shimkhia ïa ki jingeh jong baroh ki nongtrei kontraktor trai Jylla ka la pynpaw ïa ka jingsngew-khia halor ka jingmih ki Association ba bunjait.
Haba kren sha ki nongthoh khubor u Bah Emanuel Syiem Malngiang u ba dei u General Secretary ka AMCSA u la ong ba ka jingmih jong ki kynhun bapher-bapher borabor ka dei na ka daw ka jingkwah long nongïa-lam bad jingmyntoi shimet.
Shuh-shuh u la pynpaw ba na ka liang ka Association ka long kaba kloi ban ïarap ïa baroh ki kontraktor trai Jylla, naduh ki kontraktor barit haduh kiba heh, haba ki ïakynduh ïa kino-kino ki jingeh, khlem da peit shiliang ïano-ïano ruh. Nalor kata ruh u la ong ba ka Association borabor ka ju kren ïa ki mat na ka bynta ka jingmyntoi lang jong baroh ki para kontraktor.
“Shisien ba ki dang mih bun tylli ki kynhun kan dang pynpharia ïa ki kontraktor bad ïa ki mat jingdawa” da kaba u la kdew, lada ki jingdawa ki long kajuh ka jingmut lehse ka Sorkar ka lah ban sngap, hynrei lada la ki jong ki jingthmu bad ki mat jingdawa, wat ka Sorkar ruh kan shem jingeh ban sngap ïa ki jingeh bad ban pynurlong ïa ki mat jingdawa.
U la ïathuh, ha ka jingïakynduh jong ki ïa u Myntri Rangbah ka Jylla u Conrad K Sangma, ym tangba ki la ïoh ban pynsngew ïa ki jingeh, hynrei ki la ai jingmut ruh ïa ka Sorkar ban don noh da ka Meghalaya Contractor Protection Act ka ban ïada ïa ki kontraktor trai Jylla. Kumjuh ruh ka jingïoh kam ïoh jam, sa kawei pat ka jingai jingmut ban don noh ïa ka State Contractor Welfare Board, khnang ba da ka jingdon kine ki artylli ki kyndon kan pynsuk ban pynbeit ryntih haba ïadei ka jingdon ki kontraktor, kumno ban phiah ïa ki kam ki jam bad khamtam ka jingai ïa ki Bill.
“Lada ka Sorkar ka don ïa ka jingkitkhlieh na ka bynta ki nongshong shnong bad ki kontraktor trai Jylla, ka hap ban pyrkhad sani bha ïa ki jingai jingmut jong ka Association” la ong u Bah Emanuel.
