Agartala, Kyllalyngkot:
Kawei ka nongïalam jong ka seng BJP ha ka sngi Ba-ar ka la kynthoh ïa ka Tipra Motha Party, kaba dei ka seng ba la synshar lang ha Tripura, ba ka la kynnoh lamler ba ka la mih noh na ka BJP bad rung sha ka kynhun jong ka, da kaba kynnoh ba ïa ka jingdon jong ka ha ka jingïalang paidbah la pynthoh bakla lyngba ki jingpynbna bad ki jingthoh ha ki Social Media.
Kane ka nongïalam, ka dei kaba la tip kyrteng kum ka Radhamala Debbarma, ka la ong ba ka la leit sha ka jingïalang paidbah jong ka Tipra Motha ha shnong Demdum tang ban ïakynduh ïa u heh duh jong ka seng u Pradyot Kishore Deb Barma, bad ym da kano kano ka jingthmu ban pynkylla ïa ka jingmut jong ka ban kyntiap seng.
Ka Debbarma ka la ong ba la pyntip ïa ka da ki nongtrei trai shnong ba u Deb Barma u kwah ban ïakynduh ïa ka. “Watla ka don ka jingïapher ha ka saiñpyrthei, u Maharaj u dei u briew uba don burom bha na ka bynta jong ngi baroh. Mar ïa ïoh ïa ka khubor, nga la leit sha ka jaka ïalang, kaba don marjan bha bad ka jaka sah jong nga. Hynrei tang mar ïa poi, la pynmih ïa ki jingpynbna da kaba kam ba nga la pynïasoh pura sha ka seng Tipra Motha”, la ong ka Debbarma
Ka la kynnoh ba hadien kata la saphriang ïa ki dur bad ki durkhih jong ka ha ki Social Media ban pynmih ïa ka jingmut kaba bakla ba ka la iehnohkam na ka seng BJP bad pynïasoh bad ka Tipra Motha.
Haba kren ha kane kajuh ka jingïalang bad ki nongthoh khubor, u General Secretary ka BJP ka jylla u Bipin Debbarma u la ong ba ka jingkam jong ka Radhamala Debbarma ban ïasoh bad ka Tipra Motha ka long kaba khlem nongrim satia.U la ong ba ka jingleit jong ka sha katei ka jaka ka dei ka kam kaba don burom, namar ba ïa katei ka jingïalang la pynlong hajan ka ïing jong ka.
“Haba u nongmihkhmat uba kum kane ka rynsan u wan hajan ka jaka sah jong uwei, ka ju long ka dustur ban ai khublei ïa u. Ka la leh thik kumta. Hynrei u nongïalam ka Tipra Motha u Dhirendra Debbarma u la pynkylla khongpong ïa ka jingjia bad u la pynbna paidbah ba ka la pynïasoh ïalade sha ka seng,” u la ong.
U la kynnoh shuh shuh ba ki nongtrei jong ka seng ki ïeng shadien jong ka da kaba bat ïa ki lama Tipra Motha ban ïalam bakla ïa ki nongpeitkai, da kaba bynrap ba ha kano kano ka dur ym shym la ïohi ïa ka ba ka bat ïa ka lama seng ne pynbna ba kan ïasoh bad katei ka seng.
Ka BJP ka la dawa na u Tipra Motha ba un kiar na kaei kaba ki khot ka jingpynbna saiñ pyrthei kaba ïalam bakla bad ban burom ïa ki kyndon synshar paidbah, la ong ki nongïalam ka seng.
